போராட்டக் களத்தில் மலர்ந்த செம்மலர்- கே.தங்கவேல்
ருப்பூர் முருங்கப்பாளையத்தின் மண்ணில் 1951ஆம் ஆண்டு பிறந்த தங்கவேல், பின்னாளில் தொழிலாளர் போராட்டத்தின் முன்னணித் தளபதியாக உருவெடுத்தார். ராணுவத்தில் பணிபுரிந்த தந்தை கிருஷ்ணசாமியின் மகனாகப் பிறந்து, தில்லியில் சிறு வயதைக் கழித்து, திருப்பூர் திரும்பிய பின்னர் தமிழ் கற்றுத் தேர்ந்தவர். பதினைந்தாம் வயதிலேயே பனியன் தொழிற்சாலைக்குள் அடியெடுத்து வைத்து, தொழிலாளர் வாழ்வின் வலிகளையும், வறுமையையும் நெருக்கமாக உணர்ந்தவர். இளம் வயதில் கட்சி உறுப்பினர் பாரதி படிப்பகத்தின் வாயிலாக மார்க்சியக் கருத்துக்களை உள்வாங்கி, 1971இல் கம்யூனிஸ்ட் கட்சியில் இணைந்த அவர், 1972இல் பனியன் தொழிலாளர்களின் 40 நாள் வேலைநிறுத்தப் போராட்டத்தில் முழுமையாகப் பங்கேற்று கைது செய்யப்பட்டார். 450 பேருடன் கோவை மத்திய சிறையில் அடைக்கப்பட்ட அனுபவம் அவரது போராட்ட உணர்வை மேலும் தீவிரப்படுத்தியது. எமர்ஜென்சி காலத்தில் இளம் தலைவர் எமர்ஜென்சி காலகட்டத்தில் பலர் தலைமறைவான சூழலில், வெறும் 24 வயதிலேயே பனியன் தொழிலாளர் சங்கத்தின் செயலாளராகப் பொறுப்பேற்று, தொழிலாளர்களின் உரிமைக்குரல் ஓங்கி ஒலிக்கச் செய்தார். 1978இல் விசைத்தறித் தொழிலாளர் போராட்டத்தில் 96 நாட்கள் அயராது உழைத்தார். முதலாளிகளும், ஆளும்கட்சி தொழிற்சங்கமும் இணைந்து தாக்கிய போதும், 17 தொழிலாளர்களின் வீடுகள் இடிக்கப்பட்ட போதும் தளராத உறுதியுடன் போராட்டத்தை வெற்றிக்கு நடத்திச் சென்றார். சரித்திரம் படைத்த போராட்டங்கள் கைக்கு எட்டிய வெற்றிகள் மட்டுமல்ல, தோல்விகளையும் வரலாற்றுப் பாடமாக்கினார். 1981இல் 48 நாட்கள் நீடித்த போராட்டத்தின் மூலம் 25 சதவீத ஊதிய உயர்வு பெற்றுத் தந்தார். 1984இல் பஞ்சப்படிக்காக 127 நாட்கள் வீரம் செறிந்த போராட்டத்தை நடத்தி, முதலாளிகளின் சதிகளையும், பொய்ப் பிரச்சாரங்களையும் முறியடித்தார்.
“பஞ்சப்படி” நாடகத்தை உருவாக்கி நாற்பதுக்கும் மேற்பட்ட இடங்களில் நடத்தி மக்கள் ஆதரவைத் திரட்டும் புதுமையான வழிமுறையை அறிமுகப்படுத்தினார். தொழிலாளர் ஒற்றுமையின் சிற்பி பேப்ரிகேஷன் பிரிவில் 12 மணிநேரம் குறைந்த ஊதியத்தில் உழைத்த தொழிலாளர்களை இரவு ஒரு மணிக்கு டீக்கடைகளில் சந்தித்து, அவர்களை ஒருங்கிணைத்து, சம ஊதியம் பெற வழிவகுத்த தலைவர். தொழிலாளர் உறுப்பினர் பட்டியலை கையில் எடுத்துக்கொண்டு, ஒவ்வொரு கிராமமாகச் சென்று வாலிபர் சங்க கிளை அமைத்து, தொழிலாளர்களின் அரசியல் விழிப்புணர்வை வளர்த்த அற்புத அமைப்பாளர். இளம் வயதில் பெரிய பொறுப்புகள் 1986இல் 35 வயதிலேயே கோவை மாவட்ட மார்க்சிஸ்ட் கட்சியின் செயலாளராக தேர்ந்தெடுக்கப்பட்டார். பதினொரு ஆண்டுகள் அப்பொறுப்பில் இருந்து, பின்னர் திருப்பூர் கிழக்கு மாவட்ட செயலாளராகவும், மாநிலக் குழு உறுப்பினராகவும் உயர்ந்தார். சட்டமன்ற அரசியலில் தொழிலாளர் குரல் 1996ஆம் ஆண்டு திருப்பூர் தொகுதியில் சட்டமன்ற உறுப்பினராகத் தேர்ந்தெடுக்கப்பட்டார். சட்டமன்றத்தில் தொழிலாளர் குரலாக, ஒடுக்கப்பட்ட மக்களின் பிரச்சனைகளை துணிச்சலுடன் எடுத்துரைத்தார். சட்டமன்ற உறுப்பினராக இருந்தபோதும் தனது எளிமையான வாழ்க்கை முறையில் எந்த மாற்றமும் இல்லாமல் தொடர்ந்தார். எளிமையின் உருவம் தன் வாழ்நாள் முழுவதும் எளிமையை கடைப்பிடித்த தங்கவேல், பத்தாண்டுகள் செயலாளராக இருந்தபோதும் சைக்கிளில் மட்டுமே பயணித்தார். தொழிலாளர்கள் இரு சக்கர வாகனம் வாங்கித் தர முன்வந்தபோதும் மறுத்துவிட்டார். மாவட்டச் செயலாளரானபோதும் பெரும்பாலும் பொதுப் போக்குவரத்திலேயே பயணித்து, தான் பேசிய கொள்கைகளை வாழ்வில் கடைப்பிடித்து காட்டினார். கொரோனா காலத்தில் இறுதிப் பணி கோவிட்-19 தொற்றுக் காலத்தில் தொடர்ந்து தடுப்பு நடவடிக்கைகள் பற்றி விழிப்புணர்வு ஏற்படுத்தி, வாழ்வாதாரம் இழந்த மக்களுக்கு உதவிகள் செய்த அவர், 2020 செப்டம்பர் 13 அன்று கொரோனா தொற்றால் உயிரிழந்தார். அவரது மறைவு தொழிலாளர்கள், நண்பர்கள், தோழர்கள் என ஆயிரக்கணக்கானோரை துயரத்தில் ஆழ்த்தியது. நெஞ்சங்களில் நிறைந்த நினைவுகள் தங்கவேல் எவரையும் தன் சொந்தம் என உணரும் பண்பாளர். அனைவரின் குடும்ப நலனிலும் அக்கறை காட்டியவர். “ஒவ்வொருவரும் தங்கள் குடும்பத்தில் ஒருவரை இழந்து விட்டதாகவே உணர்ந்தனர்” என்ற வாசகங்கள் அவரது மனித நேயத்தின் ஆழத்தை உணர்த்துகின்றன. தொழிலாளர் போராட்ட வரலாற்றில் அழியாத அத்தியாயமாக, போராட்டக் களத்தில் மலர்ந்த செம்மலராக தோழர் தங்கவேல் என்றென்றும் நினைவில் நிலைத்திருப்பார்.