இந்தியாவிலேயே மிகப்பெரிய கோயில் எது தெரியுமா? 33 ஏக்கர் (14 லட்சம் சதுரடி) நிலப்பரப்பில் திருவாரூரில் அமைந்துள்ள, தியாகராஜர் கோயில்தான் என்பது எத்தனை பேருக்கு தெரியும்? இந்த கோயில் தான் இந்தியாவின் மிகப் பெரிய கோயிலாகும்! குறிப்பாக, 9 ராஜ கோபுரங்கள், 80 விமானங்கள், 12 பெரிய மதில்கள், 13 மிகப்பெரிய மண்டபங்கள், 15 தீர்த்தக்கிணறுகள், 3 நந்தவனங்கள், 3 பெரிய பிரகாரங்கள், 365 லிங்கங்கள் இவை வருடத்தின் மொத்த நாட்களை குறிப்பதாக சொல்லப்படுகிறது.
100க்கும் மேற்பட்ட சன்னதிகள், 86 விநாயகர் சிலைகள், 24க்கும் மேற்பட்ட உள் கோயில்கள் என பிரம்மாண்ட கோயிலாக இது விளங்குகிறது. சோழர்கள் கட்டிய கோவில் இது. சோழர்கள் மட்டுமல்லாமல், பல்லவர்கள், பாண்டியர்கள், விஜயநகர்,தஞ்சை நாயக்கர் மற்றும் மராத்திய மன்னர்களும் தத்தம் ஆட்சியில் இக்கோயிலை சிறப்பாக நிர்வகித்துள்ளனர்.
திருவாரூர் கோவிலுக்கு அழகு தருவது சுமார் 120 அடி உயரமுள்ள அதன் ராஜகோபுரமாகும். தெற்கு வடக்காக 656 அடி அகலமும், கிழக்கு மேற்காக 846 அடி நீளமும், சுமார் 30 அடி உயரமுள்ள மதிற்சுவரை நான்கு புறமும் கொண்டுள்ள நிலப்பரப்பில் இந்த ஆலயம் அமைந்துள்ளது. நான்கு புறமும் கோபுரங்களையும்,தேர் ஓடும் வீதியையும் சேர்த்து ஐந்து பிரகாரங்களுடனும் இவ்வாலயம் அமைந்துள்ளது என்பது குறிப்பிடத்தக்கது.
மார்கழி திருவாதிரை ஒரு பாதமும்,பங்குனி உத்திரம் மற்றொறு பாதமும் என தரிசனம் கிடைப்பதாக சொல்லப்படுகிறது. கிழக்கு கோபுரத்தின் உள்புறம் உள்ள 1000 கல்தூண்கள், முன்காலத்தில், திருவிழாக்காலங்களில் பந்தல் போடுவதற்காக அமைக்கப்பட்டுள்ளது. திருவாரூர் கோவில், அதன் முன்புறமுள்ள கமலாலயம் குளம், கோவிலைச் சார்ந்த தோட்டம் ஆகியவை ஒவ்வொன்றும் 5 வேலி நிலப்பரப்பில் அமைந்துள்ளதான சிறப்பு இத்தலத்திற்கு உண்டு. கோயில் ஐந்து வேலி, குளம் ஐந்து வேலி, செங்கழுநீர் ஓடை ஐந்து வேலி என்ற பழமொழி மூலம் இதன் சிறப்பை உணரலாம். (ஐந்து வேலி என்பது 1000 அடி நீளம் 700 அடி அகலம்).
இவ்வளவு பிரமாண்டமான ஆலயத்தை முழுமையாக தரிசனம் செய்து முடிக்க வேண்டுமானால் ஒரு நாள் முழுவதும் செலவிட்டால் தான் முடியும். இத்தகைய சிறப்புகள் வாய்ந்த இந்த திருவாரூர் தியாகராஜர் ஆலயத்தை முழுமையாக ஆய்வு செய்தால் இன்னும் பல புதிய தகவல்கள் கிடைக்கலாம்.
