அரசு போக்குவரத்து ஊழியர்கள் 11 ஆவது நாளாக தொடர் போராட்டம்
திருச்சிராப்பள்ளி, ஆக. 28- சிஐடியு தமிழ்நாடு அரசு போக்குவரத்து ஊழியர் சம்மேளன திருச்சி - கரூர் மண்டலங்கள் சார்பில் தமிழ்நாடு அரசு போக்குவரத்துக் கழகம் திருச்சி புறநகர் கிளை முன் 11வது நாளாக வியாழனன்று தொடர் காத்திருப்பு போராட்டத்தில் போக்குவரத்து ஊழியர்கள், ஓய்வூதியர்கள் ஈடுபட்டனர். 1.4.2003-க்குப் பின் பணியில் சேர்ந்த அனைவருக்கும் பழைய ஓய்வூதியம் வழங்க வேண்டும். 23 மாதகால ஓய்வூதிய பலன்களை உடனடியாக வழங்க வேண்டும். ஓய்வூதியர்களுக்கு பணியில் உள்ள தொழிலாளர்கள் பெரும் அகவிலைப்படி மருத்துவக்காப்பீடு ஒப்பந்த அடிப்படையில் ஓய்வூதிய உயர்வு, குறைந்தபட்ச ஓய்வூதியம் உயர்வு வழங்க வேண்டும் என்பன உள்பட பல்வேறு கோரிக்கைகளை வலியுறுத்தி நடைபெற்ற போராட்டத்திற்கு, ஓய்வு பெற்றோர் நல அமைப்பு ஜெயராமன் தலைமை தாங்கினார். திருச்சி, கரூர் மண்டல தலைவர் சிங்கராயர் துவக்க உரையாற்றினார். சிஐடியு மாநிலத் தலைவர் ஏ. சவுந்தரராசன், திருச்சி மாநகர் மாவட்டச் செயலாளர் ரெங்கராஜன், மாவட்டத் தலைவர் சீனிவாசன், கட்டுமான சங்க மாவட்டச் செயலாளர் சந்திரசேகரன் ஆகியோர் சிறப்புரையாற்றினர். போராட்டத்தை விளக்கி டி.என்.எஸ்.டி.சி திருச்சி, கரூர் மண்டல பொதுச்செயலாளர் மாணிக்கம், எஸ்.சி.டி.சி மாநிலத் தலைவர் அருள் தாஸ், எஸ்.சி.டி.சி ஓய்வு பெற்றோர் சங்க நிர்வாகிகள் ராமதாஸ், சண்முகம், டி.என்.எஸ்.டி.சி ஓய்வு பெற்றோர் சங்க நிர்வாகிகள் கருணாநிதி, சிவானந்தம் ஆகியோர் பேசினர். இதில் ஏராளமானோர் கலந்து கொண்டனர்.