குரூப் 1 முதன்மை தேர்வுக்கான முடிவுகளை தமிழ்நாடு அரசுப்பணியாளர் தேர்வாணையம் இன்று வெளியிட்டது.
தமிழக அரசுப்பணிகளுக்கு தகுதியானவர்களை தேர்ந்தெடுக்க அரசுப்பணியாளர் தேர்வாணையம் எழுத்து தேர்வு நடத்தி வருகிறது. பதவிகளின் அடிப்படையில் குருப் 1, 2, மற்றும் 4 என தேர்வுகள் நடைபெறுகின்றன. எழுத்துத் தேர்வில் வெற்றி பெற்றவர்கள் நேர்காணல் மற்றும் சான்றிதழ் சரிபார்ப்புகளுக்குப் பிறகு பணியமர்த்தப்படுகின்றனர். துணை ஆட்சியர், டிஎஸ்பி உள்ளிட்ட 181 உயர் பதவிக்கான பணியிடங்களுக்கு குரூப்-1 தேர்வு நடத்தப்பட்டது. இந்நிலையில், கடந்த ஜூலை 12-ஆம் தேதி முதல் 14-ஆம் தேதி வரை நடந்த குருப்- 1 முதன்மை தேர்வுக்கான முடிவுகளை தேர்வாணையம் இன்று வெளியிட்டது.
இந்த தேர்வில் வெற்றி பெற்றவர்களுக்கு, வரும் 23-ஆம் தேதி முதல் 31-ஆம் தேதி வரை நேர்காணல் நடைபெற உள்ளதாக தமிழ்நாடு அரசுப்பணியாளர் தேர்வாணையம் தெரிவித்துள்ளது. இந்த தேர்வு முடிவுகளை www.tnpsc.gov.in என்ற இணையதளத்தில் வெளியிடப்பட்டுள்ளது.