வதந்திக்கு அரசு மறுப்பு ஆவின் பால் விலையில் மாற்றமில்லை!
சென்னை, ஜன. 7- ஆவின் பச்சை நிற பால் பாக்கெட் விலை உயர்த்தப்பட்ட தாக சமூக வலைத்தளங்களில் பரவும் செய்தி வதந்தி என தமிழ்நாடு அரசின் தகவல் சரிபார்ப்பகம் அறிவித்துள்ளது. ஆவின் பால் விலை, லிட்டருக்கு மூன்று ரூபாய் குறைக்கப்படும் என்ற வாக்குறுதியை நிறைவேற்றாமல் இருமடங்காக 6 ரூபாய் விலை உயர்த்தப்பட்டிருப்பதாக சமூக வலைத்தளங்களில் பதிவு பகிரப்பட்டு வந்த நிலையில், இது தவறான தகவல் என அரசு தெளிவுபடுத்தியுள்ளது. தகவல் சரிபார்ப்பகம் வெளியிட்ட அறிக்கையில், கடந்த 2021-ஆம் ஆண்டு முதலமைச்சராக மு.க. ஸ்டாலின் பொறுப்பேற்றவுடன் ஆவின் பால் விலை லிட்டருக்கு 3 ரூபாய் குறைக்கப்பட்டது என்று குறிப்பிடப்பட்டுள்ளது. தற்போது ஆவின் நிறுவனம் அறிமுகப்படுத்தியிருப்பது கிரீன் மேஜிக் பிளஸ் என்ற புதிய வகை பால் பாக்கெட் என்றும் தெரிவிக்கப்பட்டுள்ளது. இந்த புதிய பால் பாக்கெட்டில் கூடுதலாக வைட்டமின் ஏ மற்றும் டி செறிவூட்டப்பட்டு உள்ளதுடன், கொழுப்புச்சத்து 4.5 சதவிகிதமாகவும், இதர சத்துக்கள் 9 சதவிகிதம் எஸ்.என்.எப். ஆகவும் உயர்த்தப்பட்டுள்ளது என்று விளக்கப்பட்டுள்ளது. கொழுப்புச்சத்து 4.5 சதவிகிதம் மற்றும் இதரச் சத்துக்கள் 8.5 சதவிகிதம் எஸ்.என்.எப் கொண்ட பழைய ஆவின் கிரீன் மேஜிக் நிலைப்படுத்தப்பட்ட பால் பாக்கெட் தற்போதும் அதே விலையில் கடைகளில் விற்பனை செய்யப்பட்டு வருவதாகவும், இதன் உற்பத்தியும் நிறுத்தப்படவில்லை என்றும் தகவல் சரிபார்ப்பகம் தெரிவித்துள்ளது. தவறான தகவலை பரப்ப வேண்டாம் என்று அரசு எச்சரித்துள்ளது.