தஞ்சாவூர், ஜன.16- தஞ்சாவூர் பள்ளியக்ரஹாரம் அருகே, புதன்கிழமை மீன்பிடி வலையில் சிக்கிய முதலை மீட்கப்பட்டது. தஞ்சாவூர் பள்ளியக்ரஹாரம் அருகேயுள்ள கூடலூர் கிராமத்தில் வெண்ணாற்றில் மீனவர்கள் புதன்கிழமை காலை வலையை விரித்து மீன் பிடித்துக் கொண்டிருந்தனர். அப்போது, வலையில் சிறிய முதலை சிக்கியதாக வனத் துறைக்கு தகவல் வந்தது. இதையடுத்து, வனத் துறையுடன் அருங்கானுயிர் காப்பு மற்றும் சுற்றுச்சூழல் அறக்கட்டளை (ஈவெட்) மீட்புக் குழுவினர் இணைந்து, கூடலூர் கிராமத்துக்குச் சென்று மீன்பிடி வலையில் சிக்கிய 3 அடி நீளமுள்ள 2 வயது முதலையை மீட்டனர். பின்னர், கும்பகோணம் அருகேயுள்ள அணைக்கரை முதலைகள் காப்பக வளாகத்தில், மீட்கப்பட்ட முதலை விடப்பட்டது.
