ஆஸ்திரேலிய வீரர் வார்னர் முச்சதன் அடித்து அசத்தல்

பாகிஸ்தானுக்கு எதிரான 2ஆவது டெஸ்ட் கிரிக்கெட் போட்டியில் ஆஸ்திரேலிய அணியின் தொடக்க ஆட்டக்காரர் டேவிட் வார்னர் முச்சதம் அடித்துள்ளார். 

ஆஸ்திரேலியா- பாகிஸ்தான் அணிகள் மோதும் 2-வது டெஸ்ட் போட்டி பகல்-இரவாக அடிலெய்டில் நேற்று தொடங்கியது. முதலில் பேட்டிங்கை தேர்வு செய்து விளையாடிய ஆஸ்திரேலியா நேற்றைய முதல் நாள் ஆட்டத்தின் முடிவில் 1 விக்கெட் இழப்புக்கு 302 ரன் குவித்து வலுவான நிலையில் இருந்தது. டேவிட் வார்னர் 166 ரன்களுடனும், லாபுசாக்னே 126 ரன்களுடனும் களத்தில் இருந்தனர். இன்று 2-வது நாள் ஆட்டம் தொடர்ந்தது. 80-வது ஓவரில் ஆஸ்திரேலியா 350-வது ரன்னை தொட்டது. இந்த ஜோடியை பாகிஸ்தான் பந்துவீச்சாளர் ‌ஷகீன்சா அப்ரிடி பிரித்தார். அணியின் ஸ்கோர் 369 ஆக இருந்தபோது மார்கஸ் லாபுசாக்னே 162 ரன்கள் குவித்து ஆட்டம் இழந்தார். இந்த ஜோடி 2-வது விக்கெட்டுக்கு 361 ரன் குவித்தது. அடுத்து ஸ்டீவ் சுமித் களம் வந்தார். 36 ரன்களில் ஆட்டமிழந்த ஸ்டீவ் சுமித் டெஸ்ட் போட்டிகளில் அதிவேகமாக 7,000 ரன்களை கடந்த முதல் வீரர் என்ற சாதனையை படைத்தார்.

இதைத் தொடர்ந்து அபாரமான ஆட்டத்தை வெளிப்படுத்திய டேவிட் வார்னர் தனது முதல் முச்சதத்தை அடித்துள்ளார்.அவர் 389 பந்துகளை சந்தித்து 37 பவுண்டரியுடன் 300 ரன்களை தொட்டார். ஆஸ்திரேலிய கிரிக்கெட் வரலாற்றில் டெஸ்ட் போட்டிகளில் முச்சதம் விளாசிய 7வது வீரர் வார்னர் ஆவார்.