தஞ்சாவூர், நவ.2- தஞ்சாவூர் மாவட்டம், பேராவூரணி அருகே இரண்டாம் புலிக்காடு கிராமத்தில் பட்டுக்கோட்டை கோட்டம் வாடகை பொருட்கள் அமைப்பாளர் நலச் சங்கம் சார்பில் ஆழ்குழாய் கிணற்றில் தவறி விழுந்து இறந்த குழந்தை சுஜித்திற்கு இரங்கல் கூட்டம் நடந்தது. திருச்சி மாவட்டம் நடுக்காட்டுப்பட்டி கிராமத்தில் கடந்த அக்டோபர் 25 ஆம் தேதி அன்று மாலை 5.40 மணியளவில் குழந்தை சுஜித் விளையாடிக் கொண்டிருந்த போது வீட்டின் அருகில் இருந்த ஆழ்குழாய் கிணற்றில் தவறி விழுந்து விட்டார். தமிழக அரசின் சார்பில் மீட்பு பணியில் ஈடுபட்டிருந்த போது அக்டோபர் 29 ஆம் தேதி அன்று அதிகாலையில் ஆழ்குழாய் கிணற்றில் இருந்து சுஜித்தின் உடல் இறந்த நிலையில் மீட்கப்பட்டது. இரங்கல் கூட்டத்திற்கு சங்கத் தலைவர் கருணாநிதி தலைமை வகித்தார். செயலாளர் மணிகண்டன் முன்னி லையில் சுஜித்திற்கு மெழுகுவர்த்தி ஏந்தி இரங்கல் கூட்டம் நடைபெற்றது. இதில் குணபாலன் மற்றும் 200 க்கும் மேற்பட்ட பொதுமக்கள் கலந்து கொண்டனர். தொடர்ந்து பட்டுக்கோட்டை கோட்ட வாடகை பொருட்களின் அமைப்பாளர் நலச் சங்கம் கூட்டம் நடைபெற்றது.
