சுனிதா வில்லியம்ஸ் 286 நாட்களுக்குப் பிறகு...விண்ணில் இருந்து மண்ணுக்கு
ர்வதேச விண்வெளி நிலையத்தில் இருந்து 286 நாட்களுக்குப் பிறகு சுனிதா வில்லியம்ஸ் புதனன்று அதிகாலை பூமிக்குத் திரும்புகிறார். சர்வதேச விண்வெளி நிலையத்தில் இருந்து, செவ்வாயன்று காலை 8:15 மணிக்கு சுனிதா வில்லியம்ஸ், புட்ச் வில்மோர், நிக் ஹாக் மற்றும் ரஷ்ய வீரர் அலெக்சாண்டர் கோர்புனோவ் ஆகியோர் அடங்கிய குழுவினர், ஸ்பேஸ் எக்ஸ் டிராகன் விண்கலத்திற்குள் சென்றனர். அதைத் தொடர்ந்து, காலை 10:35 மணிக்கு, டிராகன் விண்கலம் சர்வதேச விண்வெளி நிலையத்தை விட்டு பிரிந்தது (Undocking). பூமியை நோக்கிப் பயணத்தைத் துவங்கியது. நேரடி ஒளிபரப்பு இந்நிலையில், இந்த விண்கலம் 17 மணி நேர பயணம் செய்து இந்திய நேரப்படி புதன்கிழமை (மார்ச் 19) அதிகாலை 3:27 மணிக்கு பூமியை வந்தடையும் என கூறப்பட்டுள்ளது. முன்னதாக, அதிகாலை 2:15 மணியளவில் இருந்தே விண்கலம் பூமிக்கு திரும்பும் பயணத்தை நாசா நேரடியாக ஒலிபரப்பு செய்கிறது. அதாவது, அதிகாலை 2:41 மணிக்கு விண்கலம் அதன் சுற்றுப்பாதையிலிருந்து பூமியின் வளிமண்டலத்திற்குள் நுழையும் (நேரம் தோராயமானது). அதிகாலை 3:27 மணி - விண்கலத்தின் வேகம் குறைந்து, பாராசூட்டுகள் விரிக்கப்பட்டு பாதுகாப்பாக கடலில் இறங்கும் (நேரம் தோராயமானது). காலை 05:00 மணி - பூமிக்கு அவர்கள் திரும்பிய பிறகு நாசா மற்றும் ஸ்பேஸ் எக்ஸ் அதிகாரிகள் செய்தியாளர்களை சந்திப்பார்கள். வெப்பப் பாதுகாப்பு : முன்னதாக, விண்கலம் பூமியின் வளிமண்டலத்திற்குள் நுழையும் போது சுமார் 1,600 டிகிரி செல்சியஸ் வெப்பத்தை எதிர்கொள்ளும். இந்த அதீத வெப்பத்தில் இருந்து வெப்பப் பாதுகாப்புக் கவசங்கள் விண்வெளி வீரர்களைப் பாதுகாக்கும். ஈர்ப்பு விசை : விண்கலம் பூமியின் வளிமண்டலத்திற்குள் நுழைந்ததும், விண்வெளி வீரர்கள் புவி ஈர்ப்பு விசையைக் காட்டிலும் 4 மடங்கு அதிகமான ஈர்ப்பு விசையை எதிர்கொள்வார்கள். பாராசூட் : இறுதிக்கட்டத்தில் 4 பெரிய பாராசூட்கள் விரியும், இது விண்கலத்தின் வேகத்தைக் குறைத்து, பெருங்கடலில் பாதுகாப்பாக இறங்க வழிவகுக்கும். புதிய குழு : சுனிதா வில்லியம்ஸ் மற்றும் குழுவினர் பூமிக்குத் திரும்புவதற்கு முன்பு, ஸ்பேஸ்எக்ஸ் நிறுவனத்தின் க்ரூ-10 விண்கலத்தின் மூலம் ரஷ்யா, ஜப்பான் மற்றும் அமெரிக்காவைச் சேர்ந்த 4 விண்வெளி வீரர்கள் சர்வதேச விண்வெளி நிலையத்திற்குச் சென்றுள்ளனர். இந்த புதிய குழு சர்வதேச விண்வெளி நிலையத்தில் பணிகளைத் தொடரும். 286 நாட்களாக நீண்ட 8 நாள் : வெறும் 8 நாள் பயணமாக கடந்த 2024 ஜூன் 5-ஆம் தேதி விண்வெளி நிலையத்திற்குச் சென்ற சுனிதா வில்லியம்ஸ், புட்ச் வில்மோர் ஆகியோர் விண்கலனில் ஏற்பட்ட தொழில் நுட்ப கோளாறால் அங்கேயே தங்க நேரிட்டது. அவர்கள் பூமிக்குத் திரும்புவது சிக்கலாக மாறியது. இந்நிலையில், அவர்களை மீட்க 9 மாதங்களுக்கு பிறகு, ஸ்பேஸ்-எக்ஸ் நிறுவனத்தின் பால்கன் 9 டிராகன் ராக்கெட் ஏவப்பட்டு, அது தற்போது சுனிதா வில்லியம்ஸ் உள்ளிட்டோரை மீட்டு, பூமியை நோக்கித் திரும்பியுள்ளது.