சுவரொட்டிகள் முதல் ஏஐ வரை...
தமிழக சட்டமன்றத் தேர்தல் தேதி அறிவிப்பு நெருங்கி வரும் வேளையில், அரசியல் கட்சிகள் தொகுதிப் பங்கீடு, பூத் கமிட்டி அமைத்தல் மற்றும் தேர்தல் பணிமனைகள் திறப்பு என போர்க்கால அடிப்படையில் ஆயத்தப் பணிகளை முடுக்கிவிட்டுள்ளன. வழக்கமாக தேர்தல் காலம் என்றாலே துண்டுப் பிரசுரங்கள், பிரம்மாண்ட பிளக்ஸ் பேனர்கள், சுவர் விளம்பரங்கள் என ஊர் முழுதும் திருவிழாக் கோலம் பூணும். ஆனால், இந்த முறை தமிழக தேர்தல் களம் ஒரு புதிய பரிமாணத்தை எட்டியுள்ளது. அதுதான் ‘ஏஐ’ (Artificial Intelligence) எனப்படும் செயற்கை நுண்ணறிவு தொழில்நுட்பத்தின் ஆதிக்கம். மரபார்ந்த முறையும் மாற்றமும் ஒரு காலத்தில் கையில் பசையோடு சைக்கிளில் சென்று போஸ்டர் ஒட்டிய காலம் மறைந்துவிட்டது. வீடு வீடாகச் சென்று துண்டுப் பிரசுரங்கள் வழங்கிய இடத்தைச் சமூக வலைதளங்கள் ஆக்கிரமித்துள்ளன. கொள்கைகளையும் வாக்குறுதிகளையும் வாக்காளர்களின் உள்ளங்கைக்கு (ஸ்மார்ட்ஃபோன்) கொண்டு சேர்ப்பதில் தொழில்நுட்பம் முதன்மைப் பங்கு வகிக்கிறது. அதேநேரத்தில், வீடுவீடாக சென்று வாக்காளர் ஒவ்வொருவரையும் முகத்துக்கு முகம் பார்த்து தங்களுடைய கட்சியின் நிலைப்பாடு மற்றும் கொள்கை பிரச்சாரம் செய்வதே பயனளிக்கும். தொழிற்நுட்பத்தை பயன்படுத்துவதில் காட்டும் முனைப்பை நேரிடையாக மக்களை அரசியல் இயக்கங்கள் சந்திக்கிறபோதுதான், மக்களின் மனநிலை அறிய முடியும் என்பதை மறுக்க முடியாது. ஏஐ (AI) - பிரச்சாரத்தின் புதிய ஆயுதம் கடந்த நாடாளுமன்றத் தேர்தலிலேயே முளைவிடத் தொடங்கிய ஏஐ தொழில்நுட்பம், இந்த சட்டமன்றத் தேர்தலில் விஸ்வரூபம் எடுத்துள்ளது. இதன் சிறப்பம்சம் என்னவெனில்; தலைவர்களின் மறு உருவாக்கம்: மறைந்த தலைவர்கள் மீண்டும் தோன்றிப் பேசுவது போன்ற தத்ரூபமான வீடியோக்கள் (Deepfakes). ஒவ்வொரு வாக்காளரின் பெயரையும் சொல்லி அழைத்து வாக்குச் சேகரிக்கும் குரல் பதிவுகள். கட்சியின் கொள்கைகளை சாமானிய மக்கள் பேசுவது போலவும், எதிர்க்கட்சியினருக்கு பதிலடி கொடுப்பது போலவும் இளைஞர் அணிகள் ஏஐ வீடியோக்களை உருவாக்கி வைரலாக்கி வருகின்றன. இருபுறமும் கூர் உள்ள கத்தி தொழில்நுட்பம் வேலைப்பளுவை குறைத்தாலும், அதில் ஒளிந்துள்ள ஆபத்துகளையும் அரசியல் நோக்கர்கள் சுட்டிக்காட்டத் தவறவில்லை. “அளவுக்கு மிஞ்சினால் அமிர்தமும் நஞ்சு” என்பதற்கு ஏற்ப, ஏஐ தொழில்நுட்பம் தவறாகப் பயன்படுத்தப்படும் அபாயமும் உள்ளது: நிஜத்தில் நடக்காத ஒரு விஷயத்தை, நடந்தது போலவே காட்டும் ‘டீப்ஃபேக்’ வீடியோக்கள் வாக்காளர்களைக் குழப்பக்கூடும். தவறான தகவல்களை (Misinformation) மின்னல் வேகத்தில் பரப்பி சமூக அமைதியை குலைக்க வாய்ப்புள்ளது. உண்மை எது, பொய் எது என்று பிரித்தறிய முடியாத சூழல் உருவாவது ஜனநாயகத்திற்குப் பெரும் சவாலாக அமையும். தொழில்நுட்ப வளர்ச்சி என்பது தவிர்க்க முடியாதது. ஆனால், அதை ஆக்கப்பூர்வமான வழியில் பயன்படுத்துவதே சிறந்தது. அரசியல் கட்சிகள் தங்களின் ஆக்கப்பூர்வமான விமர்சனங்களுக்கும், கொள்கைப் பரப்புரைக்கும் மட்டும் இதனைப் பயன்படுத்த வேண்டும். நிச்சயமாக, இந்த சட்டமன்றத் தேர்தல் வெறும் வாக்குப் பெட்டிகளுக்கான போர் மட்டுமல்ல, இது தரவுகளுக்கும் (Data) தொழில்நுட்பத்திற்குமான (Technology) பெரும் யுத்தமாகவும் உருவெடுத்துள்ளது. வாக்காளர்களும் சமூக வலைதளங்களில் வரும் தகவல்களை சரிபார்த்து உள்வாங்க வேண்டியது அவசியம். -எம்.பிரபாகரன்