சென்னை;
10 மாத கொரோனா காலத்தில் சென்னை பன்னாட்டு விமான நிலையத்திற்கு கடத்திவரப்பட்ட 101 கிலோ தங்கம் பறிமுதல் செய்யப்பட்டுள்ளதாக சுங்கத்துறை ஆணையர் ராஜன் சவுத்திரி கூறியுள்ளார்.
சென்னையை அடுத்த மீனம்பாக்கத்தில் உள்ள விமான நிலையம் மற்றும் சரக்கக சுங்க இலாகா அலுவலகத்தில் 72-வது குடியரசு தின விழா கொண்டாடப்பட்டது. நிகழ்ச்சியில், தேசிய கொடியை ஏற்றி வைத்து சுங்க இலாகா அதிகாரிகளின் அணிவகுப்பை அவர் ஏற்றுக்கொண்டார்.பின்னர் ராஜன் சவுத்ரி செய்தியாளர்களிடம் கூறியதாவது:-
சென்னை விமான நிலையத்தில் சுங்க இலாகா சிறப்பாக செயல்பட்டு வருகிறது. 10 மாத கொரோனா ஊரடங்கு காலத் தில் குற்றங்களை தடுப்பது மிகுந்த சவாலாக இருந்தது. கொரோனா காலத்தில் பன்னாட்டு முனையத்திற்கு 540 சிறப்பு விமானங்கள் வந்தன. அதில், 2 லட்சம் பேர் வரை பயணம் செய்தனர்.10 மாதம் கொரோனா ஊரடங்கு காலத்தில் பன்னாட்டு சரக்ககம் மற்றும் பன்னாட்டு தபால் நிலையங்களில் கடத்தப் பட்டதாக ரூ.3 கோடியே 50 லட்சம் மதிப்புள்ள 102 போதை பொருட்களை பறிமுதல் செய்து, 11 பேர் பிடிப்பட்டனர்.மேலும், தங்கத்தை மறைத்து வைத்து கடத்தியதாக 64 வழக்குகளில் ரூ.46 கோடி மதிப்புள்ள 101 கிலோ தங்கம் பறிமுதல் செய்யப்பட்டன. அது தொடர்பாக 80 பயணிகள் கைது செய்யப்பட்டனர்.
அதுமட்டுமல்லாமல் சுங்கத்துறை அதிகாரிகளின் தீவிர கண்காணிப்பில் டாலர், யூரோ, உள்ளிட்ட வெளிநாட்டு பணங்களும் பிடிபட்டன.அதைத்தொடர்ந்து வெளிநாடுகளை சேர்ந்த அரியவகை உயிரினங்களான எலி, அணில், ஓணான், பச்சோந்தி உள்ளிட்டவனவிலங்குகள் உரிய அனுமதியின்றி கடத்தி வந்ததாக பிடிபட்டன. தென் இந்தியாவில் கொரோனா காலத்தில் சிறந்த முனையமாக செயல்பட்டதாக சென்னை விமான நிலையம் விளங்கி வருகிறது.இவ்வாறு அவர் கூறினார்.