புதுதில்லி, ஏப்.24 - கேலோ இந்தியா பல்கலைக்கழக விளையாட்டுப் போட்டிகள் 2021 ஞாயிறன்று முதல் டிடி ஸ்போர்ட்ஸ் சேனல் நேரலையாக ஒளிபரப்பாகிறது. இதனை தொலைக்காட்சிகளில் மட்டுமல்லாமல் கைபேசி வழியாகவும் காணலாம். கேலோ இந்தியா விளையாட்டுப் போட்டிகளின் ஒரு பகுதியாக, 2020ம் ஆண்டு கேலோ இந்தியா பல்கலைக்கழக விளையாட்டுப் போட்டிகள் அறிமுகப்படுத்தப்பட்டது. இதன் இரண்டாவது தொடர் ஏப்.24 முதல் மே 3ந் தேதி வரை நடைபெறுகிறது. நிறைவு விழா மே 3ந் தேதி நடைபெறவுள்ளது. இந்திய விளையாட்டு ஆணையத்தின் ஒத்துழைப்புடன் டிடி ஸ்போர்ட்ஸ் விரிவான ஒளிபரப்புக்கு ஏற்பாடுகளைச் செய்துள்ளது. நாடு முழுவதிலும் உள்ள 175 பல்கலைக் கழகங்களைச் சேர்ந்த 3800க்கும் மேற்பட்ட தடகள வீரர்கள் இதில் பங்கேற்கின்றனர். தடகளம், வாலிபால், நீச்சல், கூடைப்பந்து, பளுதூக்குதல், மல்யுத்தம், கபடி, கராத்தே, யோகாசனா ஆகியவை நேரலையாக ஒளிபரப்பாகும். ஜூடோ, டென்னிஸ், வில் வித்தை, வாள்சண்டை, கால்பந்து, டேபிள் டென்னிஸ், பாட்மின்டன், ஹாக்கி, துப்பாக்கி சுடுதல், குத்துச்சண்டை ஆகியவை பதிவு செய்யப்பட்டு ஒளிபரப்பப்படும். பிரசார் பாரதி யுடியூப் சேனலிலும் இது ஒரே நேரத்தில் ஒளிபரப்பாகும். விளையாட்டுப் போட்டிகள் டிடி ஸ்போர்ட்சில் ஒவ்வொரு நாளும் காலை 9 மணி முதல் மாலை 6 மணி வரை ஒளிபரப்பாகும். இதனைத் தொடர்ந்து அரை மணி நேர ஹைலட்ஸ் ஒளிபரப்பாகும்.
ஊடக உலகில் உண்மையின் பேரொளி