சென்னை, அக். 13- சென்னை மெட்ரோ ரயில் நிறுவனத்தின் சார்பில் 2ஆம் கட்ட திட்டப்பணிகள் நடைபெற்று வருகிறது. இந்நிலையில் அந்த பாதைகளில் 3 பெட்டிகள் கொண்ட ரயில்களை மட்டுமே இயக்க திட்டமிடப்பட்டிருந்தது. ஆனால் இப்போது கூட்ட நெரிசல் அதிகமாக இருப்பதால் தலா 3 பெட்டிகள் கொண்ட 2 ரயில்களை, 6 பெட்டிகள் கொண்ட ரயில்களாக இயக்க திட்டமிடப்பட்டுள்ளது. இதுகுறித்து சென்னை மெட்ரோ ரயில் நிறுவனத்தின் அதிகாரிகள் கூறியதாவது: 116 கி.மீ. தூரம் வரை இரண்டாம் கட்டத் திட்டப்பணிகள் நடைபெற்று வருகிறது. இதில் 3 வழித்தடங்கள், ஒவ்வொரு மெட்ரோ ரயிலுக்கும் 3 பெட்டிகள் மற்றும் 6 பெட்டி கள் கொண்ட ரயில்கள் இயக்கப்படும். இப்போது, முதல் மற்றும் முதல் கட்ட விரிவாக்க திட்டங்களில் பயணிகளின் அதிகரிப்பை கருத்தில் கொண்டு, இரண்டாம் கட்ட திட்டத்திலும் இதேபோன்ற சூழ்நிலைகளை சமாளிக்க தயாராக இருக்க ஏற்பாடுகள் செய்யப்பட்டுள்ளது. தற்போது உள்ள மெட்ரோ ரயில்களில் 3 பெட்டிகள் கொண்ட ரயில்கள் மட்டுமே உள்ளது. இந்த ரயில்களில் 3 பெட்டிகள் கொண்ட ரயில் பெட்டிகளை இணைத்து அதை 6 பெட்டிகளாக இயக்க ஏற்பாடு செய்யப்பட்டுள்ளது. தேவை அதிகரித்தால் நாங்கள் இதைச் செய்வோம். ஒன்றன் பின் ஒன்றாக இந்த ரயில்கள் அறிமுகப்படுத்தப்படும். வெளிநாடுகளில் உள்ள சில மெட்ரோ ரயில் அமைப்புகளும் இதுபோல் ரயில் பெட்டிகளை இணைத்து இயக்கியுள்ளன. சில நேரங்களில் மூன்று பெட்டிகள் கொண்ட ரயில்கள் கூட்ட நெரிசல் இல்லாத நேரங்களில் இயக்கப்படும். மேலும் நெரிசலான நேரங்களில் 6 பெட்டிகள் கொண்ட ரயில்கள் இயக்கப்படும். சென்னை சென்ட்ரல் முதல் செண்ட் தாமஸ் மவுண்ட் வரை, வண்ணாரப்பேட்டை முதல் சென்னை விமான நிலையம் வரை, வண்ணாரப்பேட்டை முதல் விம்கோ நகர் பணிமனை வரை 54 கி.மீ. வரை மெட்ரோ இயக்கப்பட்டு வருகிறது. இப்போது தினசரி சராசரியாக சுமார் 2.8 லட்சம் பயணிகளைக் கையாண்டு வருகிறது. தமிழ்நாடு அரசின் ஒப்புதலுக் குப் பிறகு, இப்போது 54 கி.மீ. நெட்வொர்க்கிற்கான கூடுதல் ரயில்களுக்கு நிதி கோரி இருக்கிறோம். மேலும் தயாரிக்கப்பட்ட ரயில்கள் இன்னும் 2 ஆண்டு களில் வர வாய்ப்புள்ளது.
