ஜனவரி 13 ஆம் தேதியன்று 3 மொழிகளில் திரையரங்குகளில் வலிமை படம் வெளியாகும் என போனி கபூர் தெரிவித்துள்ளார்.
'நேர்கொண்ட பார்வை’ படத்தைத் தொடர்ந்து நடிகர் அஜித் ‘வலிமை’ படத்தில் நடித்து வருகிறார். அவரின் 60-வது படமாக உருவாகி வரும் இப்படத்தை இயக்குநர் எச்.வினோத் இயக்கியுள்ளார். வலிமை படத்தில் அஜித்துக்கு ஜோடியாகப் பாலிவுட் நடிகை ஹூமா குரேஷி நடிக்க, யோகிபாபு நகைச்சுவை கதாபாத்திரத்திலும், தெலுங்கு நடிகர் கார்த்திகேயா வில்லனாகவும் நடித்துள்ளனர். யுவன் சங்கர் ராஜா இசையமைத்துள்ள இப்படத்திற்கு நிரவ் ஷா ஒளிப்பதிவு செய்துள்ளார்.
முன்னதாக வலிமை படத்தின் ஃபஸ்ட் லுக், மோஷன் போஸ்டர், அம்மா சென்டிமென்ட் பாடல், ட்ரெய்லர் ஆகியவை வெளியாகி ரசிகர்கள் மத்தியில் நல்ல வரவேற்பு பெற்ற நிலையில், இப்படம் ஜனவரி 13 ஆம் தேதி திரையரங்குகளில் வெளியாகும் எனத் தெரிவிக்கப்பட்டுள்ளது.
இதுகுறித்து தனது டிவிட்டர் பக்கத்தில் தெரிவித்துள்ள தயாரிப்பாளர் போனி கபூர், ‘வலிமை’ திரைப்படம் தமிழ், இந்தி, தெலுங்கு ஆகிய மொழிகளில் ஜனவரி 13 ஆம் தேதி அன்று திரையரங்குகளில் வெளியாகும் என்று உறுதி செய்துள்ளார். இதன் மூலம் வலிமை படம் பொங்கலுக்குத் திரையரங்குகளில் வெளியாவது உறுதியாகியுள்ளது.