தோல் நோய் மருத்துவ முகாம்

தோல் நோய்  மருத்துவ முகாம்

அறந்தாங்கி, அக். 13-  காசாவில் இருந்து இஸ்ரேல் ராணுவம் முழுமையாக வெளியேற வலியுறுத்தி புதுக்கோட்டை மாவட்டம் அறந்தாங்கி திசைகள் மாணவ வழிகாட்டு அமைப்பு சார்பாக, மாபெரும் இலவச தோல் நோய் மருத்துவ முகாம் அறந்தாங்கியில் நடத்தப்பட்டது.  முகாமை விடுதலைச் சிறுத்தைகள் கட்சியின் மாவட்டச் செயலாளர் இரா. தமிழ்ச்செல்வன், அறந்தாங்கி ரோட்டரி சங்க முன்னாள் தலைவர் பீர்சேக், மனிதநேய ஜனநாயக கட்சியின் மனித உரிமைகள் அணி மாநிலச் செயலாளர் முனைவர் முபாரக் அலி, மாநிலக் குழு உறுப்பினர் அஜ்மீர், அறந்தாங்கி தி ஃபோர்ட் சிட்டி ரோட்டரி தலைவர் தீன் ஆகியோர் தொடங்கி வைத்தனர்.  திசைகள் மாணவ வழிகாட்டு அமைப்பின் பொருளாளர் முபாரக் தொடக்க நிகழ்விற்கு வரவேற்புரை ஆற்றினார். அறந்தாங்கி தி ஃபோர்ட் சிட்டி ரோட்டரி முன்னாள் தலைவர் கான் அப்துல் கபர்கான், திசைகள் அமைப்பின் ஒருங்கிணைப்பாளர் சற்குருநாதன் வாழ்த்துரை வழங்கினர்.  தோல்நோய் மற்றும் அழகு கலை மருத்துவர் டாக்டர் தெட்சிணாமூர்த்தி 250 மருத்துவ பயனாளிகளுக்கு சிகிச்சை அளித்தார். திசைகள் ஒருங்கிணைப்பாளர்  மாடசாமி நன்றி கூறினார்.