போயிங் நிறுவனத்திடம் இருந்து முதல் அப்பாச்சி கார்டியன் ஹெலிகாப்டரை இந்திய விமானப்படை வாங்கியுள்ளது.
அமெரிக்காவின் அரிசோனாவைச் சேர்ந்த போயிங் நிறுவனத்திடம் இந்திய விமானப் படைக்கு 22 அப்பாச்சி கார்டியன் ஹெலிகாப்டர்களை வாங்கும் ஒப்பந்தம் கடந்த 2015-ஆம் ஆண்டு செப்டம்பர் மாதம் கையெழுத்தானது.
இந்த ஒப்பந்தத்தில் கூறப்பட்ட 22 ஹெலிகாப்டர்களில் முதல் ஹெலிகாப்டர் மட்டும் இந்திய விமானப் படையிடம் தற்போது ஒப்படைக்கப்பட்டிருக்கிறது. அப்பாச்சி கார்டியன் ஹெலிகாப்டரை அமெரிக்க அரசு அதிகாரிகள் இந்திய ஏர் மார்ஷல் புட்டோலாவிடம் வழங்கினர். இன்னும் சில ஹெலிகாப்டர்கள் வரும் ஜூலை மாதம் கிடைக்கும்.
இந்த ரக ஹெலிகாப்டர்களை இயக்குவது தொடர்பாக, தேர்வு செய்யப்பட்ட விமானப் படை குழுவுக்கு அலபாமாவில் உள்ள அமெரிக்க ராணுவத் தளத்தில் பயிற்சி அளிக்கப்படுகிறது.
இரு வீரர்கள் பயணிக்கும் வசதி உள்ள அப்பாச்சி கார்டியன் ஹெலிகாப்டர் அதிகபட்சம் 10,433 கிலோ எடையைத் தாங்கும். மணிக்கு 293 கிலோ மீட்டர் வேகத்தில் பயணிக்க முடியும். வானத்திலிருந்து தரையில் உள்ள இலக்கை தாக்கும் ஏவுகணைகள், 1200 ரவுண்டுகள் சுடக்கூடிய எம்.320 செயின் கன் மற்றும் ராக்கெட்டுகள் இந்த ஹெலிகாப்டர்களில் இணைக்கப்பட்டிருக்கும். இருளிலும் தெளிவான காட்சிகளை வழங்கும் தொழில்நுட்பமும் உள்ளது. இந்த ஹெலிகாப்டர் மூலம் போர்க்களத்திலிருந்து படங்களை பெறவும் வசதி இருக்கிறது.