சென்னை
தமிழகத்தில் உள்ள பல மாவட்டங்களில் கொரோனா பரவல் சற்று கட்டுக்குள் வந்தாலும் மாநிலத்தின் தலைநகர் பகுதியான சென்னையில் கொரோனா பரவல் மின்னல் வேகத்தில் தான் உள்ளது. குறிப்பாக கடந்த 24 மணிநேரத்தில் அங்கு 103 பேருக்கு கொரோனா பாதிப்பு ஏற்பட்டுள்ளது.
இதன்மூலம் தமிழகத்தில் இன்று 121 பேருக்கு கொரோனா தொற்று உறுதி செய்யப்பட்டுள்ள நிலையில், மாநிலத்தின் மொத்த பாதிப்பு 2 ஆயிரத்து 58 ஆக உயர்ந்துள்ளது. சென்னையில் மொத்த பாதிப்பு 673 ஆக உயர்ந்துள்ளது. சென்னைக்கு அடுத்து செங்கல்பட்டில் 12 பேருக்கு கொரோனா பாதிப்பு உறுதி செய்யப்பட்டுள்ளது. கள்ளக்குறிச்சியில் 3 பேரும், நாமக்கல்லில் 2 பேரும், காஞ்சிபுரத்தில் ஒருவர் என மேற்குறிப்பிட்ட 5 மாவட்டங்களில் மட்டுமே இன்று கொரோனா பாதிப்பு உள்ளது. தமிழ்நாட்டில் ஈரோடு கொரோனா இல்லாத மாவட்டமாக மாறியுள்ளது. ஏற்கெனெவே கிருஷ்ணகிரி மாவட்டத்தில் கொரோனா பாதிப்பு இல்லாமல் இருந்த நிலையில், ஈரோடும் அந்த பட்டியலில் சேர்ந்துள்ளது.