விடுதலை பெற்று எழுபது ஆண்டுகள்
வீணாய்ப் போனது!-நாட்டில
கெடுதலை சாதியும் மதமும்
மோதிக் கெட்டுப் போனது!
ஆலைகள் சாலைகள் எல்லாம் இங்கே
தனியார் ஆனது!-நாட்டில்
நாளைய இளைஞர் கூட்டம்
கெட்டு வீதியில் நிற்குது!
கோலை ஏந்திய ஆட்சி மதுவைக்
குடுவையில் விற்குது!-நாட்டில்
சோலைக் காற்று நன்னீர்
உணவில் நஞ்சு கலக்குது!
குறிஞ்சி முல்லை மருதம் நெய்தல்
பாலை ஆனது!-அட
உறிஞ்சியே அவற்றின் இயற்கைத்
தன்மை ஒழிந்து போனது!
நச்சுக் காற்றால் நாங்கள் இறக்கிறோம்
ஆலையை மூடென்றால்-மக்கள்
உச்சந் தலைமுதல் உடலெல்லாம்
பிய்ந்திட சுட்டுத் தள்ளுகின்றார்!
ஆறுதல் சொல்லிட வந்தொரு நடிகர்
உளறிக் கொட்டுகிறார்!-அவர்
போரிடும் வன்முறைத் தீவிர
வாதியாம் தேளாய்க் கொட்டுகிறார்!
பகுத்த றிந்து உண்மையைச் சொன்ன
தபோல்கர் பன்சாரே!-நாட்டில்
உகுத்த செந்நீர் கல்புர்கி
லங்கேஷ்கர் உயிர்கள் குடித்தது!
தொகுத்து அறியும் அவரின் நெஞ்சைத்
தோட்டா துளைத்தது!-அட
பகுத்த அறிவினை மதவெறி
போக்கிட நாளும் குலைக்குது!
உண்பதில் உடுப்பதில் கூட இங்கே
தடைகள் விதிக்குது!-நாட்டில்
திணிக்கும் ஒற்றைக் கலாச்சார
இந்துத்வாக் கொள்கை குதிக்குது!
இயற்கை வளங்கள் எல்லாம் இங்கே
சுரண்டப் படுகிறது!-நாட்டில்
வியக்கும் விவசாயத் தொழிலை
அழிக்கும் விளைவைத் தொடுகிறது!
கிழவியும் சிறுமியும் கூட யிங்கெ
கதறித் துடிக்குது!-நாட்டில்
அழுகிய காமத் தீயோர்
செயலால் அழிவில் வெடிக்குது!
பாலியல் சாமியார்க் கெல்லாம் பாஜக
பலமாய் இருக்குது!-அட
கூலியாக அவருக்கு நாள்தோறும்
கோடிகள் கொட்டிக் கொடுக்குது!
நான்கு ஆண்டுகள் பாஜக ஆட்சியில்
நாடே கெட்டது!-அட
இங்கும் மாநில ஆட்சியர்
கையால் தமிழகம் பட்டது!
பணத்தின் மதிப்பை இழக்கச் செய்து
பலரைக் கொன்றார்கள்!-அட
பிணத்தின் மீது ஆட்சி
நடத்தும் பிழப்பைக் கொண்டவர்கள்!
வரியை ஜிஎஸ்டி என்றே
தலையில் வைத்தார்கள்!-அட
நரியைப் போல நாட்டை
முதலாளித் தீக்குள் திணித்தார்கள்!
நாளும் பெட்ரோல் டீசல் எரிவாயு
விலையை உயர்த்துகிறார்!-அட
தோளும் துவண்டிட ஏழையர்
வாழ்வில் சுமையை அழுத்துகிறார்!
ஆண்டுக்கு மூன்று கோடி பேருக்கு
வேலை என்றார்கள்!-அந்த
மண்ணாளும் மோடி பக்கோடா
விற்கப் பரிந்துரை பண்ணுகிறார்!
கருப்புப் பணத்தை மீட்டு வங்கியில்
போடுவேன் என்றார்!-நீங்கள்
விருப்பம் போலச் செலவுகள்
செய்து மகிழலா மென்றார்!
ஆண்டுகள் ஐந்து ஆகியும் பைசா
வந்திட வில்லையே!-அட
அண்டப் புளுகர் அவரின்
நாக்கு அழுகிட வில்லையே!
மனதோடு பேசுவார், வெளிநாட்டில் பேசுவார்
தோசையும் கேட்பார்!-இங்கே
தினந்தோறும் போராடும் விவசாயி
தொழிலாளி மக்களிடம் பேசார்!
நாடு நாடாகச் சுற்றி நாளைப்
போக்கியே விட்டார்!-அட
தேடி வந்தது ஒன்றுமே
இல்லை கோடிகள் செலவழித்தார்!
தாழ்த்தப் பட்டோர் மீது எங்கும்
தாக்குதல் நடக்குது!-அட
வீழ்ந்தவர் உடலில் பாஜக
ஆனந்தத் தாண்டவம் நடத்துது!
வீழ்ந்தது உடலன்று விதைகள் அவைகள்
விரைவில் மரமாகும்!-அட
சூழ்ந்திடும் பகைகளைத் தூக்கி
எறிகின்ற வீரிய உரமாகும்!
மாண்டவர் மீண்டும் வருவது நிச்சயம்
சத்தியம் செய்கின்றேன்!-அட
மீண்டும் நாளை உயிர்த்து எழுவார்
நடப்பது மெய்யென்பேன்!