புதிய வகை ஒமிக்ரான் கொரோனா வைரஸ் பரவலைத் தொடர்ந்து தென் ஆப்ரிக்காவில் நடைபெறவிருந்த சர்வதேச இளையோர் பெண்கள் உலகக்கோப்பை ஹாக்கி போட்டி தேதி குறிப்பிடாமல் ஒத்திவைக்கப்பட்டுள்ளது.
தென் ஆப்பிரிக்காவில் கண்டறியப்பட்ட புதிய வகை கொரோனா பரவலை தடுக்க உலக நாடுகள் பலவும் பல்வேறு முன்னெச்சரிக்கை நடவடிக்கையை மேற்கொண்டு வருகின்றன. இந்நிலையில் சர்வதேச இளையோர் பெண்கள் உலகக் கோப்பை ஹாக்கி போட்டியை தற்காலிகமாக ஒத்திவைத்து சர்வதேச ஹாக்கி கூட்டமைப்பு அறிவித்துள்ளது. தென் ஆப்பிரிக்காவின் போட்செஃப்ஸ்ட்ரூமில் டிச.5 ஆம் தேதி முதல் 16 ஆம் தேதி உலகக்கோப்பை போட்டி நடைபெற இருந்தது. பல்வேறு நாடுகளின் விளையாட்டு வீரர்களின் உடல்நலத்தை கணக்கில் கொண்டு போட்டிகள் ஒத்திவைக்கப்படுவதாக தெரிவிக்கப்பட்டுள்ளது. மேலும் கொரோனா நிலைகளை கருத்தில் கொண்டு போட்டி தேதிகள் பின்னர் அறிவிக்கப்படும் என ஹாக்கி கூட்டமைப்பு அறிவித்துள்ளது.