2026 ஆம் ஆண்டுக்கான உலக சமத்துவ மின்மை அறிக்கை புதன்கிழமை அன்று வெளியிடப்பட்டது. இந்த அறிக்கை, பல்வேறு நாடுகளின் வாங்கும் சக்தி, வேலை வாய்ப்பின்மை மற்றும் சமத்துவ மின்மை குறித்த விரிவான விவரங்களைத் தொகுத்துள்ளது. அதன் முக்கிய கண்டுபிடிப்புகளின்படி, உலக அளவில் மிக அதிக சமத்துவமின்மை கொண்ட நாடுகளில் ஒன்றாக இந்தியா உள்ளது.
உலக சமத்துவமின்மை ஆய்வகத்தால் (World Inequality Lab) வெளியிடப்பட்ட இந்த அறிக்கை, சமீபத்திய ஆண்டுகளில் இந்தியாவில் சமத்துவமின்மை குறைவதற்கான எந்தவொரு தெளிவான அறிகுறியும் தென்படவில்லை என்று சுட்டிக்காட்டுகிறது.
இந்தியாவின் ஏற்றத்தாழ்வு நிலவரம் :
சொத்து மற்றும் வருமானம்
சொத்து ஏற்றத்தாழ்வு
- இந்தியாவில், மொத்த மக்கள் தொகையில் முதல் 1% பேர், நாட்டின் மொத்த செல்வத்தில் சுமார் 40%-ஐ தங்கள் வசம் வைத்துள்ளனர்.
- மிகவும் செல்வந்தர்களான முதல் 10% பேர், மொத்த செல்வத்தில் சுமார் 65%-ஐ கொண்டுள்ளனர்.
- இந்தியா சொத்து மற்றும் வருமானம் ஆகிய பரிமாணங்களில் ஆழமான சமத்துவமின்மையைக் கொண்டுள்ளது.
- வருமான ஏற்றத்தாழ்வு
- அதிக வருமானம் ஈட்டும் முதல் 10% பேர், தேசிய வருமானத்தில் 58% பங்கு பெறுகின்றனர்.
- மிகக் குறைந்த வருமானம் பெறும் கீழ்மட்ட 50% மக்களுக்கு, தேசிய வருமானத்தில் வெறும் 15% மட்டுமே கிடைக்கிறது.
- 2014 முதல் 2024 வரையிலான காலகட்டத்தில், அதிக வருமானம் ஈட்டும் முதல் 10 சதவீதத்தினருக்கும், குறைந்த வருமானம் ஈட்டும் 50 சதவீதத்தினருக்கும் இடையேயான வருமான இடைவெளி நிலையானதாகவே இருந்துள்ளது.
- வாங்கும் சக்தி சமநிலை (Purchasing Power Parity - PPP) அடிப்படையில், ஒரு நபருக்கான சராசரி வருமானம் சுமார் 6,200 யூரோக்கள் (தோராயமாக ₹6.49 லட்சம்) என அறிக்கை தெரிவிக்கிறது.
வாங்கும் சக்தி சமநிலை (PPP)
இது ஒரு பொருளாதாரக் கருவியாகும். ஒரே அளவு பணத்தைக் கொண்டு வெவ்வேறு நாடுகளில் என்னென்ன பொருட்களை வாங்க முடியும் என்பதை அளவிடுவதன் மூலம், வெவ்வேறு நாணயங்களின் மதிப்பை ஒப்பிடுவதற்கு இது உதவுகிறது.
பாலின சமத்துவமின்மை
- அறிக்கையின்படி, இந்தியாவில் பெண்களின் தொழிலாளர் பங்கேற்பு விகிதம் 15.7% ஆக மிகக் குறைவாக உள்ளது.
- கடந்த 10 ஆண்டுகளில் இந்த விகிதத்தில் எந்த முன்னேற்றமும் ஏற்படவில்லை என்று அந்த அறிக்கை கவலை தெரிவித்துள்ளது.
- மொத்தத்தில், இந்தியாவில் வருமானம், செல்வம் மற்றும் பாலினம் ஆகிய பரிமாணங்களில் சமத்துவமின்மை ஆழமாக வேரூன்றி, பொருளாதாரத்திற்குள் நீடித்து வரும் கட்டமைப்பு ரீதியான பிளவுகளை வெளிப்படுத்துகிறது என்று அறிக்கை எச்சரிக்கிறது.
உலகளாவிய போக்குகள்
- உலக அளவில் செல்வம் வரலாற்று உச்சத்தை எட்டியிருந்தாலும், அது மிகவும் சமமற்ற முறையில் விநியோகிக்கப்பட்டுள்ளது என்றும் அறிக்கை கூறுகிறது.
- 60,000க்கும் குறைவான கோடீஸ்வரர்களைக் கொண்ட முதல் 0.001% பேர், ஒட்டுமொத்த மனிதகுலத்தின் அடித்தட்டு 50% மக்களிடம் உள்ள செல்வத்தைவிட மூன்று மடங்கு அதிக செல்வத்தை வைத்திருக்கிறார்கள்.
- உலகின் கிட்டத்தட்ட ஒவ்வொரு பிராந்தியத்திலும், முதல் 1% பேரிடம் உள்ள செல்வம், அடித்தட்டு 90% பேரிடம் உள்ள மொத்த செல்வத்தைவிட அதிகமாக உள்ளது.
- உலகளாவிய நிதி அமைப்பு பணக்கார நாடுகளுக்குச் சாதகமாகவே தொடர்ந்து செயல்படுகிறது என்றும் அறிக்கை சுட்டிக்காட்டுகிறது.
சமத்துவமின்மையின் முக்கியத்துவம்
இந்த 2026 சமத்துவமின்மை அறிக்கையின் முதன்மை ஆசிரியரான ரிக்கார்டோ கோமஸ் - கரெரா, “சமத்துவமின்மை என்பது பெரும் அவமானகரமாக மாறும் வரை அமைதியாகவே இருக்கும்” என்று குறிப்பிட்டுள்ளார். மேலும், இன்றைய சமமற்ற சமூக மற்றும் பொருளாதாரக் கட்டமைப்புகளால் வாய்ப்புகள் மறுக்கப்படும் கோடிக்கணக்கான மக்களுக்காக இந்த அறிக்கை குரல் கொடுக்கிறது என்றும் அவர் கூறியுள்ளார். இந்த அறிக்கை, சமத்துவமின்மையின் அதிகரிப்பு, பலதரப்பு வாதத்தின் பலவீனம் ஆகிய இரு நெருக்கடிகளை முன்னிலைப்படுத்துகிறது. காலநிலை மாற்றம், பாலின ஏற்றத்தாழ்வுகள், மனித மூலதனத்திற்கான சமமற்ற அணுகல், உலகளாவிய நிதி அமைப்பில் உள்ள சமச்சீரற்ற தன்மைகள் மற்றும் ஜனநாயகங்களை மறுவடிவமைக்கும் பிராந்திய பிளவுகள் போன்ற 21ஆம் நூற்றாண்டை வரையறுக்கும் ஏற்றத்தாழ்வுகளின் புதிய பரிமாணங்களை உலக சமத்துவமின்மை அறிக்கை ஆராய்கிறது.
இதற்கு முன்னர் சமத்துவமின்மை அறிக்கை 2018 இல் வெளியிடப்பட்டது என்பது குறிப்பிடத்தக்கது. இந்த அறிக்கையின் தரவுகள், உழைப்பாளி மக்களைப் போராட்டப் பாதையில் திரட்டுவதற்கான ஆயுதங்களில் ஒன்றாகட்டும்!