வாஷிங்டன்:
அமெரிக்க ஜனாதிபதி ஜோ பைடனுக்கும், துணை ஜனாதிபதி பதவி கமலா ஹாரிஸுக்கும் உலகின் பல நாடுகளில் இருந்து வாழ்த்துக்கள் குவிகின்றன.
முதல் வாழ்த்தாக ஜோ பிடனுக்கும் அவரது மனைவி ஜில் பிடனுக்கும், கமலா ஹாரிஸுக்கும் அமெரிக்க முன்னாள் ஜனாதிபதி பராக் ஒபாமா வாழ்த்து தெரிவித்தார்.இது தொடர்பாக தனது ட்விட்டர் பக்கத்தில் எனது நண்பர்களான அடுத்த அமெரிக்க ஜனாதிபதி ஜோ பைடன், அடுத்த துணை ஜனாதிபதி கமலா ஹாரிஸ் ஆகியோருக்கு வாழ்த்துக்கள் என்று தொடங்கி, நமது ஜனநாயகத்துக்கு முன்பை விட தற்போதுதான் நாம் அனைவரும் அதிகமாக தேவைப்படுகிறோம் என்று நிறைவு செய்துள்ளார்.
பிரதமர் மோடி
பிரதமர் மோடி அவர் தனது ட்விட்டர் பக்கத்தில், “அற்புதமான உங்களுடைய வெற்றிக்கு வாழ்த்துகள். அமெரிக்க துணை ஜனாதிபதியாக நீங்கள் வழங்கிய பங்களிப்பால் இந்திய, அமெரிக்க உறவுகள் வலுப்பெற்றது. அந்த உறவுகள் மிகப்பெரிய உச்சத்துக்கு செல்ல உங்களுடன் நெருக்கமாக மீண்டும் பணியாற்றும் எதிர்பார்ப்புடன் இருக்கிறேன்,” என்று கூறியுள்ளார். கமலா ஹாரிஸுக்கான வாழ்த்துச் செய்தியில், “உங்களை வெற்றிப்பயணம், திருப்பம் நிறைந்தது. இது உங்களுடைய சித்திகளுக்கு மட்டுமின்றி எல்லா இந்திய-அமெரிக்கர்களுக்கும் மிகச்சிறந்த பெருமை தரும் விஷயமாகும். துடிப்புமிக்க இந்திய, அமெரிக்க தொடர்புகள் உங்களுடை ஆதரவு மற்றும் தலைமையால் மேலும் வலுப்பெறும் என்று நான் நம்புகிறேன்,” என்று கூறியுள்ளார்.
சோனியா, ராகுல் காந்தி
காங்கிரஸ் முன்னாள் தலைவர் ராகுல் காந்தி விடுத்துள்ள வாழ்த்துச் செய்தியில், பிடன் தனது தலைமையில் அமெரிக்காவை ஒருங்கிணைத்து வலுவான பாதையில் அந்நாட்டை வழி நடத்துவார் என்று கூறியுள்ளார்.கமலா ஹாரிஸுக்கு விடுத்துள்ள வாழ்த்துச் செய்தியில், இந்திய வேர்களுடன் கூடிய ஒருவர் அமெரிக்காவின் முதல் பெண் துணை ஜனாதிபதியாவதை நினைத்து பெருமிதம் கொள்வதாக ராகுல் காந்தி கூறியுள்ளார்.சோனியா காந்தி விடுத்துள்ள வாழ்த்துச் செய்தியில் விவேகமுள்ள, முதிர்ச்சியுள்ள பிடன், கமலா ஹாரிஸ் தலைமையில், உலகம் முழுவதும் மற்றும் நமது பிராந்திய அமைதி மற்றும் வளர்ச்சிக்கு பயன் தரக்கூடிய நெருக்கமான உறவை இந்தியா எதிர்பார்க்கிறது என்று கூறியுள்ளார்.
இம்ரான் கான்
பாகிஸ்தான் பிரதமர் இம்ரான் கான் தனது ட்விட்டர் பக்கத்தில் பதிவிட்ட வாழ்த்துச் செய்தியில், ஜனநாயகம் தொடர்பான சர்வதேச உச்சிமாநாட்டில் பைடனுடன் பங்கேற்கும் நாளை எதிர்பார்ப்பதாகவும் சட்டவிரோத வரி ஏய்ப்பு மற்றும் தேசத்தின் வளங்களைச் சுரண்டும் ஊழல் தலைவர்களின் செயல்பாட்டை முடிவுக்கு கொண்டு வரும் நடவடிக்கையிலும் பைடனுடன் இணைந்து பணியாற்றும் நாளை எதிர்நோக்கியுள்ளதாகவும் கூறியுள்ளார். ஆப்கானிஸ்தான் பிராந்தியத்தில் அமைதியை பராமரிக்க அமெரிக்காவுடன் பாகிஸ்தான் தொடர்ந்து பணியாற்றும் என்று இம்ரான் கான் தெரிவித்துள்ளார்.கனடா பிரதமர் ஜஸ்டின் ட்ரூடோ, தனது ட்விட்டர் பக்கத்தில் அமெரிக்காவும் கனடாவும் நெருங்கிய நட்பு நாடுகள் மட்டுமின்றி கூட்டாளிகளாகவும் உள்ளன. உலக மேடையில் இரு நாடுகளும் சிறப்பான உறவைக் கொண்டிருப்பதாகவும் அதன்படியே தொடர்ந்து பணியாற்றுவோம் என்றும் அவர் நம்பிக்கை தெரிவித்துள்ளார்.
பிரிட்டன், ஜெர்மனி, பிரான்ஸ்
பிரிட்டிஷ் பிரதமர் போரிஸ் ஜான்சன் விடுத்துள்ள வாழ்த்துச் செய்தியில், அமெரிக்கா எங்களுக்கு மிக முக்கியமான கூட்டாளி நாடு. பருவநிலை மாற்றம், வர்த்தகம், பாதுகாப்பு என பலதரப்பட்ட விவகாரங்களில் இணைந்து பணியாற்றுவோம் என்று எதிர்பார்ப்பதாக கூறியுள்ளார்.ஜெர்மனி அதிபர் ஏஞ்சலா மெர்கல், எப்போதும் போலவே இரு நாடுகளும் வலுவாந உறவைப் பேணிக்காக்கும் என்று கூறியுள்ளார்.பிரான்ஸ் ஜனாதிபதி இமானுவேல் மக்ரோங், இன்றைய யுகத்தில் இரு தரப்பும் பல சவால்களை இணைந்து எதிர்கொள்ள வேண்டும். அதற்கு இரு தரப்பும் தயாராவோம் என்று கூறியுள்ளார்.