அக்கச்சிப்பட்டி பள்ளிக்கு சிறந்த பள்ளிக்கான விருது
புதுக்கோட்டை, ஜூலை 9 - புதுக்கோட்டை மாவட்டம் கந்தர்வகோட்டையை அடுத்த அக்கச்சிப்பட்டி ஊராட்சி ஒன்றிய நடுநிலைப்பள்ளி சிறந்த பள்ளிக்கான பேராசிரியர் அன்பழகன் விருதைப் பெற்றுள்ளது. பள்ளிக்கல்வி துறையின் சார்பில் அண்ணா தலைமைத்துவ விருது, பேராசிரியர் அன்பழகன் விருது, கற்றல் அடைவுகளுக்கான நூறு சவாலில் பங்கேற்ற பள்ளிகளுக்கு பாராட்டு என முப்பெரும் விழா அண்மையில் திருச்சியில் நடைபெற்றது. விழாவில் அக்கச்சிப்பட்டி ஊராட்சி ஒன்றிய நடுநிலைப் பள்ளிக்கு சிறந்த பள்ளிக்கான பேராசிரியர் அன்பழகன் விருதினை, நகர்ப்புற வளர்ச்சித்துறை அமைச்சர் கே.என். நேரு, பள்ளிக்கல்வித்துறை அமைச்சர் அன்பில் மகேஸ் பொய்யாமொழி ஆகியோர், தலைமை ஆசிரியர் தமிழ்செல்வியிடம் வழங்கிப் பாராட்டினர். இந்நிகழ்வில், பள்ளி ஆசிரியர்கள் மணிமேகலை, ரகமதுல்லா, சிந்தியா, நிவின், வெள்ளைச்சாமி, ஜெம்ம ராகினி சகாய ஹில்டா, ஜாய் உள்ளிட்டோர் பங்கேற்றனர்.