நடிகை மனோரமாவின் மகன் பூபதி மறைவு
சென்னை, அக். 23- புகழ்பெற்ற நடிகை மனோரமாவின் ஒரே மகன் பூபதி, உடல்நலக்குறைவால் உயிரிழந்தார். அவருக்கு வயது 70. தமிழ்ச் சினிமாவில் முன்னணி நடிகையாக திகழ்ந்தவர் மனோரமா. குணச்சித்திர நடிப்பு, நகைச்சுவை உள்ளிட்ட பல்வேறு கதாப்பாத்திரங்களில் ஆயிரத்திற்கும் மேற்பட்ட படங்களில் நடித்து சாதனை படைத்தார். கடந்த 2015 அக்டோபர் 10 அன்று அவர் காலமானார். மனோரமாவின் ஒரே மகன் பூபதி. இவர், சென்னை தியாகராய நகரில் உள்ள வீட்டில் வசித்து வந்தார். இந்நிலையில், மூச்சுத் திணறல் காரணமாக வியாழனன்று அவர் காலமானார். அவரது மரணத்திற்கு திரையுலகினர் இரங்கல் தெரிவித்து வருகின்றனர். பூபதிக்கு, ராஜராஜன் என்ற மகனும், அபிராமி, மீனாட்சி என்ற இரு மகள்களும் உள்ளனர். இறுதி நிகழ்ச்சிகள் வெள்ளிக்கிழமையன்று நடைபெறுகிறது. நடிகர் விசுவின் ‘குடும்பம் ஒரு கதம்பம்’ படத்தில் அறிமுகமான பூபதி, அதன் பின்னர் சில படங்களில் நடித்தார்.