தஞ்சாவூர்: தஞ்சாவூர் மாவட்டம், மதுக்கூர் வட்டாரத்தில் நடந்த உலக மண் தின விழாவில், “மண் உயிர் பெருக்கி மண்வளம் காக்க வேண்டும்” என பள்ளி மாணவர்களுக்கு விழிப்பு ணர்வு ஏற்படுத்தப்பட்டது. மதுக்கூர் அரசு ஆண்கள் மேல்நிலைப்பள்ளியில் வேளாண் துறை மற்றும் ஆர்.வி.எஸ் வேளாண் கல்லூரி மாணவிகள் இணைந்து, உலக மண் தின விழா மற்றும் பேரணியும் நடத்தினர். மதுக்கூர் வேளாண் உதவி அலுவலர் ஜாஹிர் தலைமை வகித்தார். பள்ளி தலைமை ஆசிரியர் பிரகாஷ் முன்னிலை வகித்தார். ஆர்.வி.எஸ் வேளாண் கல்லூரி மாணவிகள் விழிப்புணர்வு வாசகங்கள் அடங்கிய பதாகைகளை ஏந்தி பொதுமக்கள் மற்றும் விவசாயிகளிடையே பேரணி மூலம் விழிப்புணர்வு ஏற்படுத்தினர். பயிர் காப்பீட்டு பணியாளர்கள் திவ்யா, பிரியதர்ஷினி ஆகியோர் பேரணி ஏற்பாடுகளை செய்திருந்தனர்.
