100 நாள் தொழிலாளர்கள் சமூக இடைவெளியை பின்பற்ற வேண்டும்
புதுதில்லி, ஏப்.19- கொரோனா வைரஸ் பரவலை கட்டுப்ப டுத்த நாடு முழுவதும் வரும் மே 3-ஆம் தேதி வரை ஊரடங்கு நீட்டிக்கப்பட்டுள்ளது. இதற்கிடையே, கொரோனா பாதிப்பின் அதிதீவிர பகுதிகள் ( ஹாட்ஸ்பாட்) தவிர்த்து, குறைவான பாதிப்பு உள்ள இடங்களில் சில தளர்வுகளை மத்திய அரசு அறிவித்துள்ளது. உள்துறை அமைச்சகம் வெளியிட்ட இந்தத் தளர்வுகள் இன்று (திங்கள்)முதல் அமலுக்கு வருகின்றன. இது குறித்த விவரங்களை மத்திய அமைச்சர் ரவிசங்கர் பிரசாத் டுவிட்டரில் வெளியிட்டுள்ளார். அதன் விவரம் பின்வருமாறு:-
- ஆயுஷ் உள்பட அனைத்து மருத்துவ சேவைகள் செயல்படும்.
- வேளாண் மற்றும் தோட்டத் தொழில்களுக்கு அனுமதி.
- மீன்பிடித் தொழில் (கடல்/ உள்நாடு) தொடர்ந்து இயங்கும்.
- தேயிலை, காப்பி, ரப்பர் தோட்டத் தொழில்கள், அதிகபட்சம் 50 சதவீத ஊழியர்களுடன் செயல்படலாம்.
- கால்நடை வளர்ப்போர் தங்களது பணிகளை மேற்கொள்ளலாம்.
- நிதித்துறை மற்றும் சமூக நலத்துறை செயல்படும்.
- தேசிய ஊரக வேலைவாய்ப்பு திட்டம் தொடரும். இதில் ஊழியர்கள் முக கவசம் அணிந்து சமூக இடைவெளியை கடைப்பிடிக்க வேண்டும்.
- பொது வினியோகத்துறை செயல்படும்.
- மாநிலங்கள், மாவட்டங்களுக்கு இடையேயான சரக்கு போக்குவரத்துக்கு அனுமதி.
- ஆன்லைன் மூலம் கற்பித்தல் மற்றும் தொலைதூர கல்விக்கு அனுமதி.
- அத்தியாவசிய பொருட்கள் வினியோகம் செய்யலாம்.
- வர்த்தகம், தனியார் நிறுவனங்கள் கட்டுப்பாடுகளுடன் இயங்கலாம்.
- கட்டடத் தொழில்களை தொடரலாம்
- தனியார் வாகனங்களை மருத்துவம் உள்ளிட்ட அவசர தேவைக்காக இயக்கலாம்.
- அனைத்து மத்திய, மாநில, யூனியன் பிரதேச அலுவலகங்கள் செயல்படும்.
இந்த அறிவிப்புகள் கொரோனா பாதிப்பு தீவிரமாக உள்ள பகுதிகளுக்கு (ஹாட்ஸ்பாட்) பொருந்தாது.