நாட்டில் உள்ள ஐஐடி, என்ஐடி போன்ற மத்திய உயர்கல்வி நிறுவனங்களில் இளநிலை பொறியியல் படிப்புகளில் சேர ஜேஇஇ எனப்படும் ஒருங்கிணைந்த நுழைவுத் தேர்வில் தேர்ச்சி பெற வேண்டும். இவை ஜேஇஇ முதல்நிலைத் தேர்வு, ஜேஇஇ பிரதானத் தேர்வு என 2 கட்டங்களாக நடத்தப்படும்.வரும் ஆண்டில் முதல்நிலை ஜேஇஇ ஜனவரி 6 முதல் 11ஆம் தேதி வரை நடைபெற உள்ளது. வரும் 30ஆம் தேதி வரை விண்ணப்பிக்க அவகாசம் வழங்கப்பட்டுள்ளது. மாணவர்கள் nta.ac.in என்ற இணையதளம் வழியாக விண்ணப்பிக்கலாம். இதுவரை ஜேஇஇ முதல்நிலை தேர்வு எழுதுபவர்கள் வினாத்தாளில் இடம்பெற்றுள்ள கேள்விகளுக்கு தவறாக விடையளித்தால் அதற்கு மைனஸ் மதிப்பெண் வழங்கப்படும்.தற்போது அந்த நடைமுறை மாற்றப்பட்டு வினாத்தாளில் இடம்பெறும் மல்டிபிள் சாய்ஸ் கேள்விகளுக்கு அளிக்கும் தவறான விடைகளுக்கு மட்டுமே இனி மதிப்பெண் குறைக்கப்படும். கோடிட்ட இடத்தை நிரப்புக உட்பட இதர வடிவிலான கேள்விகளில் தவறான பதில்களுக்கு மதிப்பெண் குறைக்கப்படாது. இதுகுறித்த விவரங்கள் என்டிஏ இணையதளத்தில் வெளியிடப்பட்டுள்ளது. அதன்படி தேர்வுக்கு மாணவர்கள் தயாராக வேண்டுமென அதில் குறிப்பிடப்பட்டுள்ளது. தேர்வு முடிவுகள் ஜனவரி 31ஆம் தேதி வெளியிடப்படும்.
