டான்செட் 2022 தேர்வுக்கு மார்ச் 30 முதல் ஏப்ரல் 18 ஆம் தேதி வரை விண்ணப்பிக்கலாம் என்று அண்ணா பல்கலைக்கழகம் அறிவித்துள்ளது.
இதுகுறித்து அண்ணா பல்கலைக்கழகம் வெளியிட்டுள்ள அறிவிப்பில், வரும் 2022-23ஆம் கல்வியாண்டில் எம்.பி.ஏ, எம்.சி.ஏ மற்றும் எம்.இ, எம்.டெக், எம்.ஆர்க், எம்.பிளான் ஆகிய பட்டப் படிப்பிற்கான நுழைவுத் தேர்வினை எழுதுவதற்கு மார்ச் 30 ஆம் தேதி முதல் ஏப்ரல் 18 ஆம் தேதிவரை விண்ணப்பிக்கலாம். https://tancet.annauniv.edu/tancet/ என்ற இணையதளத்தில் ஆன்லைன் மூலம் விண்ணப்பிக்கலாம், மேலும் விபரங்களை இந்த இணையதளத்தில் சென்று தெரிந்துக் கொள்ளலாம்.
அதனைதொடர்ந்து பொது, எம்பிசி, பிசி பிரிவைச் சேர்ந்தவர்கள் கட்டணமாக ரூ.600 செலுத்த வேண்டும். எஸ்சி, எஸ்சிஏ, எஸ்டி பிரிவினர் ரூ.300 செலுத்த வேண்டும். ஒன்றுக்கு மேற்பட்ட பாடங்களுக்கு தேர்வு எழுத விரும்புபவர்கள் அவற்றிற்கு தனித்தனியே ரூ.600 அல்லது ரூ.300 செலுத்த வேண்டும்.
ஆன்லைனில் விண்ணப்பம் செய்யும்போது மாணவர்கள் பயன்படுத்தும் மின்னஞ்சல், செல்போன் எண்ணை பயன்படுத்த வேண்டும். தேர்வுக்கட்டணத்தை ஆன்லைன் மூலம் மட்டுமே செலுத்த வேண்டும். இந்த தேர்வுக்கான நுழைவுச்சீட்டு மே 2ஆம் தேதி வெளியிடப்படும்.
எம்.சி.ஏ. படிப்பிற்கு மே 14ஆம் தேதி காலை 10 மணி முதல் 12 மணி வரையும், எம்.பி.ஏ.படிப்பிற்கு மே 14ஆம் தேதி மதியம் 2.30 மணி முதல் 4.30 மணி வரையும், எம்.இ, எம்.டெக், எம்.ஆர்க், எம்.பிளான் படிப்பிற்கு மே 15ஆம் தேதி காலை 10 மணி முதல் 12 மணிவரை நுழைவுத் தேர்வு நடைபெறும்.
இந்த நுழைவுத் தேர்வானது சென்னை, கோயம்புத்தூர், சிதம்பரம், திண்டுக்கல், ஈரோடு, காரைக்குடி, மதுரை, நாகர்கோவில், சேலம், தஞ்சாவூர், திருநெல்வேலி, திருச்சிராப்பள்ளி, வேலூர், விழுப்புரம், விருதுநகர் உள்ளிட்ட 15 இடங்களில் நடைபெறும் என இவ்வாறு அதில் கூறப்பட்டுள்ளது.