10,11,12 ஆம் வகுப்பு பொதுத்தேர்வுக்கான அட்டவணையை பள்ளிக்கல்வித்துறை அமைச்சர் அன்பில் மகேஷ் பொய்யாமொழி இன்று புதன்கிழமை வெளியிட்டார்.
கொரோனா தொற்றால் பள்ளி, கல்லூரிகள் மூடப்பட்ட நிலையில் தற்போது மீண்டும் திறக்கப்பட்டு நேரடி வகுப்புகள் நடைபெற்று வருகின்றன. இந்நிலையில் சென்னை தலைமை செயலகத்தில் புதன்கிழமை காலை 10,11 மற்றும் 12 ஆம் வகுப்புகளுக்கான பொதுத்தேர்வு தேதி விபரங்களை பள்ளிக்கல்வித்துறை அமைச்சர் அன்பில் மகேஷ் பொய்யாமொழி வெளியிட்டார்.
அதனடிப்படையில் 10 ஆம் வகுப்பு பொதுத்தேர்வு மே 6 முதல் மே 30 வரை நடைபெற உள்ளது. இதற்கான தேர்வு முடிவுகள் ஜூன் 17 ஆம் தேதி வெளியிடப்படும்.
11 ஆம் வகுப்பு பொதுத்தேர்வு மே 9 ஆம் தேதி தொடங்கி மே 31 ஆம் தேதி வரை நடைபெறும். இதற்கான தேர்வு முடிவுகள் ஜூலை 7 ஆம் தேதி வெளியிடப்படும்.
12 ஆம் வகுப்பு பொதுத்தேர்வு மே 5 முதல் மே 28 வரையும், இதற்கான தேர்வு முடிவுகள் ஜூன் 23 ஆம் தேதியும் வெளியிடப்படும்.
மேலும் 10,11 மற்றும் 12 ஆம் வகுப்புகளுக்கான செய்முறை தேர்வு ஏப்.25 ஆம் தேதி தொடங்கும்.
அதனைதொடர்ந்து 2022-23 ஆம் கல்வியாண்டில் 11 ஆம் வகுப்பு தவிர பிற வகுப்புகளுக்கு ஜூன் 13 முதல் மீண்டும் பள்ளிகள் திறக்கப்படும். 11 ஆம் வகுப்பு மாணவர்களுக்கு ஜூன் 24 ஆம் தேதி பள்ளிகள் திறக்கப்படும் என தெரிவித்தார்.
எந்தெந்த தேதிகளில் என்னென்ன தேர்வுகள் நடக்கும் என்பது குறித்த அறிவிப்பு பள்ளிக்கல்வித்துறை இணைய தளத்தில் வெளியிடப்படும் என்று அமைச்சர் அன்பில் மகேஷ் பொய்யாமொழி தெரிவித்துள்ளார்.