சென்னை, மே 27-மதச்சார்பற்ற கூட்டணி கட்சிகள் சார்பில் தமிழக வாக்காளர்க ளுக்கு நன்றி அறிவிப்பு கூட்டம் மற்றும் கருணாநிதி 96-வது பிறந்தநாள் விழா சென்னை நந்தனம் ஒய்.எம்.சி.ஏ. மைதானத்தில் வருகிற 3 ஆம் தேதி 4 மணிக்கு நடக்கிறது. மக்களவைத் தேர்தலில் தமிழகத்தில் திமுக தலைமையிலான மதச்சார்பற்ற கூட்டணி 37 இடங்களை கைப்பற்றியது. திமுக போட்டியிட்ட 19 இடங்களிலும் வெற்றி பெற்றது. இதையடுத்து கூட்டணி கட்சிகள் சார்பில் தமிழக வாக்காளர்களுக்கு நன்றி அறிவிப்பு கூட்டம் மற்றும் கருணாநிதி 96-வது பிறந்தநாள் விழா சென்னை நந்தனம் ஒய்.எம்.சி.ஏ. மைதானத்தில் வருகிற 3 ஆம் தேதி (திங்கட்கிழமை) 4 மணிக்கு நடக்கிறது.கூட்டத்துக்கு பொதுச்செயலாளர் அன்பழகன் தலைமை தாங்குகிறார். திமுக தலைவர் மு.க.ஸ்டாலின் சிறப்புரையாற்றுகிறார். பொருளாளர் துரைமுருகன் முன்னிலை வகிக்கிறார். மா.சுப்பிரமணியன் எம்.எல்.ஏ. வரவேற்கிறார்.தமிழக காங்கிரஸ் தலைவர் கே.எஸ்.அழகிரி, மதிமுக பொதுச்செயலாளர் வைகோ, மார்க்சிஸ்ட் கம்யூனிஸ்ட் கட்சித் தலைவர் கே.பாலகிருஷ்ணன், இந்திய கம்யூனிஸ்டு கட்சித் தலைவர் முத்தரசன், விடுதலை சிறுத்தைகள் கட்சித் தலைவர் திருமாவளவன், திராவிடர் கழக தலைவர் வீரமணி, இந்திய யூனியன் முஸ்லிம் லீக் கட்சித் தலைவர் காதர் மொய்தீன், கொங்கு நாடு மக்கள் தேசிய கட்சித் தலைவர் ஈஸ்வரன், இந்திய ஜனநாயக கட்சித் தலைவர் பாரிவேந்தர், மனிதநேய மக்கள் கட்சித் தலைவர் ஜவாஹிருல்லா, தமிழக வாழ்வுரிமை கட்சித் தலைவர் வேல்முருகன், எம்.ஜி.ஆர்.கழக தலைவர் ஆர்.எம்.வீரப்பன், சமத்துவ மக்கள் கழக தலைவர் எர்ணாவூர் நாராயணன் உள்ளிட்ட பலர் கலந்துகொண்டு பேசுகிறார்கள்.
ஊடக உலகில் உண்மையின் பேரொளி