சென்னை, ஜூன் 11- கூட்டுறவு நிறுவனங்கள் மூலம் வழங்கப்பட்டு வந்த கல்விக் கடனுக்கான வரம்பு ரூ. 5 லட்சமாக உயர்த்தப்படுவதாக அமைச்சர் பெரியகருப்பன் தெரிவித்திருக்கிறார். இதுகுறித்து கூட்டுறவுத்துறை அமைச்சர் பெரியகருப்பன் வெளியிட்டுள்ள செய்திக் குறிப்பில் தெரிவித்துள்ளதாவது:- “இளைஞர்கள் வாழ்வில் முன்னேற்றம் அடை வதற்கு, கல்வி மிகவும் அவசியமாகும். அவ்வாறு கல்லூரி கல்வி பயிலும் மாணவர்களுக்கு குடும்ப வருமானம் ஒரு தடையாக இருக்கக் கூடாது என கருதி, தமிழ்நாடு முதலமைச்சர் உத்தரவுப் படி, கூட்டுறவு நிறுவனங்கள் மூலம் மாணவர் களின் புத்தகக் கட்டணம், தங்கும் விடுதிக் கட்டணம், உணவுக் கட்டணம், பயிற்சிக் கட்டணம் போன்ற பல்வேறு கல்வி கட்டணங்களைச் செலுத்த ஏதுவாக வழங்கப்பட்டு வந்த கல்விக் கடன் ரூ. 1 லட்சமாக இருந்த நிலையில், அது தற்போது ரூ. 5 லட்சமாக உயர்த்தப்பட்டுள்ளது. கல்விக்கடன் பெறும் மாணவர்கள் கல்வி பயிலும் காலம் முடிந்து 6 மாதங்கள் கழித்து வரும் 5 வருடங்களுக்குள் கடனைத் திருப்பி செலுத்த வேண்டும். இக் கல்விக் கடனுக்கான அதிகபட்ச வட்டி விகிதம் 10 விழுக்காடாகும். அங்கீகரிக்கப்பட்ட பல்கலைக்கழகம் மூலம் அங்கீகரிக்கப்பட்ட பட்டயப் படிப்பு மற்றும் இளங்கலை பட்டப்படிப்பு மட்டுமின்றி, முதுகலைப் பட்டப் படிப்புக்கும், தொழில்முறை படிப்புகளுக்கும் கூட்டுறவு நிறுவனங்கள் கல்விக் கடன் வழங்குகின்றன. முதலாம் ஆண்டு மாணவர்களுக்கு மட்டு மின்றி, இரண்டாம் ஆண்டு, மூன்றாம் ஆண்டு பயிலும் கல்லூரி மாணவர்களுக்கும் கல்விக் கடன் வழங்கப்படுகின்றன. தமிழ்நாடு சிறுபான்மையினர் பொருளாதார மேம்பாட்டுக் கழகத்தில் (டாம்கோ) சிறுபான்மை யின மாணவர்களுக்கு கூட்டுறவு வங்கிகள் மூலம் குறைந்த வட்டி விகிதத்தில் கல்விக் கடன் வழங்கப்படுகின்றன. எனவே, மாணவர்கள் தமிழ்நாடு மாநில தலைமைக் கூட்டுறவு வங்கி, மாவட்ட மத்தியக் கூட்டுறவு வங்கிகள், நகரக் கூட்டுறவு வங்கிகள், நகரக் கூட்டுறவுக் கடன் சங்கங்கள், தொடக்க வேளாண்மைக் கூட்டுறவுக் கடன் சங்கங்கள், நிறுவனங்களை அணுகி, உரிய ஆவணங்களை சமர்ப்பித்து, கல்விக் கடன் பெற்று மாணவர்கள் தங்களின் கல்விக் கனவை நனவாக்கிக் கொள்ள வேண்டும்” இவ்வாறு அமைச்சர் தெரிவித்துள்ளார்.
