திருவனந்தபுரம்:
கேரளத்தில் உள்ள கரிப்பூர் விமான நிலையம் வழியாக கோடிக்கணக்கில் தங்கம் கடத்தலில் ஈடுபட்டதாக கண்டறியப்பட்ட சுங்கத்துறையின் உயர் அதிகாரிகள் மீது வழக்கு பதிவு செய்ய கேரள அரசு சிபிஐக்கு அனுமதி அளித்துள்ளது. 

சிபிஐ விசாரணையின் போது தங்கக் கடத்தலில் ஈடுபட்டதாகக் கண்டறியப்பட்ட நான்கு கண்காணிப்பாளர்கள் உட்பட 14 அதிகாரிகள் மீது வழக்கு உள்ளது. சிபிஐ கொச்சி பிரிவு எஸ்.பி. வழக்கு பதிவு செய்ய அனுமதி கோரியிருந்தார். சுங்க அதிகாரிகளுக்கு எதிராக வழக்கு பதிவு செய்ய அனுமதிக்கும் உத்தரவை உள்துறை கூடுதல் தலைமைச் செயலாளர் செவ்வாய்க்கிழமை பிறப்பித்தார்.வழக்குகளை பதிவு செய்ய சிபிஐயின் பொது அனுமதி நவம்பர் 4 அன்று கேரளத்தில் ரத்து செய்யப்பட்டது. வழக்குத் தாக்கல் செய்ய அரசு சிறப்பு அனுமதி வழங்க வேண்டும். கிடைக்கக்கூடிய ஆதாரங்களுடன் கோப்பை முதல்வரிடம் சிபிஐ சமர்ப்பித்தது. ஒப்புதல் உத்தரவு புதன்கிழமை வழங்கப்பட்ட நிலையில், சிபிஐ அதிகாரிகள் எர்ணாகுளம் சிறப்பு நீதிமன்றத்தில் முதல் தகவல் அறிக்கை தாக்கல் செய்ய உள்ளனர்.

சுங்க கண்காணிப்பாளர்களான கே.எம்.ஜோஸ், கணபதிபோற்றி, சத்தியமேந்திர சிங், எஸ்.ஆஷா, ஆய்வாளர்களான யாசர் அராபத், நரேஷ், சூயீர், சஞ்சீவ் குமார், ரமேந்திர சிங், யோகேஷ், பி.சி.மினிமோள், தலைமை அவில்தார் சி.அசோகன், அவில்தார் பிரான்சிஸ், அலுவலக உதவியாளர் மணி ஆகியோருக்கு எதிராக வழக்கு தொடுக்க இந்த அனுமதி அளிக்கப்பட்டுள்ளது.கரிப்பூர் வழியாக தங்கம் கடத்தலில் சுங்கத்துறையின் உதவி இருப்பதாக கிடைத்த தகவலைத் தொடர்ந்து சிபிஐ அதிரடி விசாரணையை மேற்கொண்டது. ஜனவரி 12, 13 ஆகிய தேதிகளில் வருவாய் புலனாய்வுத் துறையின் (டிஆர்ஐ) ஒத்துழைப்புடன் இந்த விசாரணை மேற்கொள்ளப்பட்டது. வளைகுடா நாடுகளில் இருந்து அதிக அளவு தங்கம் மற்றும் சட்டவிரோத பொருட்கள் கடத்தப்பட்டிருப்பது கண்டுபிடிக்கப்பட்டது. இது கடமையில் உள்ள சுங்க அதிகாரிகளின் மறைமுக ஒப்புதலுடன் நடந்தது என்பதும் கண்டறியப்பட்டது.

நம்பகத்தன்மை இழந்த சுங்கத்துறை
சுங்கத்துறைக்கு எதிரான சிபிஐ விசாரணை என்பது புலியை சிறுத்தை பிடிப்பது போன்றது. கரிப்பூரில் தங்கக் கடத்தல் தொடர்பாக  சுங்கத்துறை நடத்தியுள்ள கடுமையான குற்றங்களை சிபிஐ கண்டறிந்துள்ளது. திருவனந்தபுரம் விமான நிலையத்தில் நடந்த தங்க கடத்தல்கள் தொடர்பாகவும் சுங்கத்திற்கு எதிரான குற்றச்சாட்டுகள் உள்ளன. தூதரக பார்சல்களில் தங்கம் கடத்தப்பட்ட வழக்கில் உண்மையான குற்றவாளிகளைப் பிடிக்க சுங்கத்துறை தயாராக இல்லை என்பதும் ஒரு மர்மமாகும். இந்த நிலையில்தான், கரிப்பூர் தங்கக் கடத்தல் தொடர்பாக சுங்க கண்காணிப்பாளர்கள் உள்ளிட்ட பலர் மீது சிபிஐ வழக்கு பதிவு செய்துள்ளது.

சிபிஐயின் நடவடிக்கை, சுங்கத்துறை மற்றும் அமலாக்க இயக்குநரகத்தை அரசியல் ரீதியாக துஷ்பிரயோகம் செய்யும் பாஜக மற்றும் யுடிஎப் -க்கு இது ஒரு அடியாகும். முறையாக விசாரணை நடந்தால் தங்கம் சென்றடைந்த இடத்தையும் கண்டறிய முடியும். அதனுடன், சில லீக் தலைவர்கள் சிக்கிக்கொள்வார்கள். மின்னல் பரிசோதனையின் சுங்க அதிகாரிகளுக்கும் சில அரசியல் தலைவர்களுக்கும் இடையிலான தொடர்புக்கான ஆதாரங்களையும் அதிரடி சோதனையில் சிபிஐ அதிகாரிகள் கண்டறிந்துள்ளனர். 

திருவனந்தபுரம் தங்கக் கடத்தல் வழக்கில் முதலமைச்சரையும் அவரது அலுவலகத்தையும் சிக்க வைக்க அனைத்து முயற்சிகளிலும் ஈடுபட்டு வரும் சுங்கத்துறையின் நம்பகத்தன்மைக்கு சிபிஐ நிலைபாடு ஒரு அடியாகும். சிபிஐ மத்திய புலனாய்வு நிறுவனம் என்பதால், விசாரணையை அரசியல் நோக்கம் கொண்டது என்ற குற்றச்சாட்டுக்கு உள்ளாக்கி தப்ப முடியாது.