சென்னை, டிச.1 - சென்னையில் அயோத்திதாச பண்டிதரின் 175வது ஆண்டு நினை வாக அமைக்கப்பட்ட மணிமண்ட பத்தை முதலமைச்சர் மு.க.ஸ்டாலின் திறந்து வைத்தார். தமிழ்நாடு அரசின் சார்பில் திராவிடப் பேரொளி அயோத்திதாசப் பண்டிதரின் புகழுக்கு பெருமை சேர்க்கும் வகையில், அயோத்திதாசப் பண்டிதர் 175-வது ஆண்டு விழா கொண்டாடப்பட்டது. இந்த விழாவின் நினைவாக ரூ.2 கோடியே 49 லட்சம் மதிப்பில் சென்னை கிண்டி, காந்தி மண்டபம் வளாகத்தில் அயோத்திதாசப் பண்டிதரின் உருவச் சிலையுடன் கூடிய மணிமண்டபம் புதிதாக கட்டப்பட்டுள்ளது. முதலமைச்சர் மு.க.ஸ்டாலின் இந்த மணிமண்டபத்தை வெள்ளியன்று (டிச.1) திறந்து வைத்து பேசியதாவது. “இது அரசுக்கு கிடைத்த மிகப்பெரிய பெருமை. தமிழ் சிந்தனை மரபை வளர்த்தெடுத்த அயோத்தி தாசர் பெருமையை போற்றும் வகையில் இந்த திருவுருவ சிலை அமைக்கப்படும் என 2021-ம் ஆண்டு அரசு அறிவித்தது. இந்த மணிமண்டபம் அறிவொளி இல்ல மாக அமைந்துள்ளது. இந்த சிலையை திறந்து வைப்பதை பெருமையாக கருதுகிறேன்.
தமிழ்நாட்டு அரசியலில் தமிழன், திராவிடம் ஆகிய இரண்டு சொற்களை அடையாள சொல்லாக மாற்றியவர் அயோத்திதாசர். தமிழ் அல்லது திராவிடம் மொழி மட்டும் அல்ல, அது ஒரு பண்பாட்டு நடைமுறையாக மாற்றியவர் அயோத்திதாசர். 1907-ம் ஆண்டு ஒரு பைசா தமிழன் என்ற இதழை தொடங்கி, அதையே தமிழன் என்ற இதழாக நடத்தி வந்தார். ஒடுக்கப்பட்ட மக்கள் அனைத்து வேற்றுமையையும் மறந்து, ஒன்றாக இருக்க போராடியவர் அயோத்திதாசர். சாதிய அடுக்கு முறை சமூகத்தை மாற்றி அமைக்கும் முயற்சியில் ஈடுபட்ட தலைசிறந்த சிந்தனையாளர் அயோத்திதாச பண்டிதர் என்பது குறிப்பிடத்தக்கது. 19-ம் நூற்றாண்டின் மத்திய காலத்தில் தொடங்கி, 20-ம் நூற்றாண்டின் தொடக்கம் வரை, பௌத்த சமய வழியில் தீண்டாமைக்கு எதிரான சிந்தனைகள் வளர்த் தெடுத்து, சுயமரியாதை, சமதர்ம கருத்துக்களில் விழிப்புணர்வு ஏற்படுத்தியவர். ஏடுகள் தொடங்கி வாசிப்பு வழி பரப்புரை தளம் அமைத்தவர். இவ்வாறு முதலமைச்சர் மு.க.ஸ்டாலின் பேசினார். இந்த விழாவில், அமைச்சர்கள் க.பொன்முடி, எ.வ.வேலு,மு.பெ.சாமிநாதன், பி.கே.சேகர்பாபு, மா.சுப்பிரமணியன், என். கயல்விழி, திராவிடர் கழகத் தலைவர் கி.வீரமணி, மதிமுக பொதுச் செயலாளர் வைகோ, திருமாவளவன், ஆ.ராசா, தமிழச்சி தங்கப்பாண்டியன், ரவிகுமார், செல்வப்பெருந்தகை, காதர் மொய்தீன், திண்டுக்கல் ஐ.லியோனி உள்ளிட்ட பலர் கலந்து கொண்டனர்.