நடிகர் விஜயின் அடுத்த படம் குறித்த அதிகாரப்பூர்வ தகவலைப் படக்குழுவினர் வெளியிட்டுள்ளதால் அவரது ரசிகர்கள் உற்சாகமடைந்துள்ளனர்.

நடிகர் விஜய் தற்போது 'பீஸ்ட்' படத்தில் நடித்து வருகிறார். சன் பிக்சர்ஸ் தயாரித்துள்ள இந்த படத்தை நெல்சன் திலிப்குமார் இயக்கி வருகிறார்.  மேலும் இந்த படத்தில் விஜயுடன் பூஜா ஹெக்டே, செல்வராகவன் உள்ளிட்ட பல முக்கிய பிரபலங்களும் நடித்துள்ளனர்.

'பீஸ்ட்' நடிகர் விஜயின் 65வது படம் என்பதால் ரசிகர்கள் மத்தியில் மிகுந்த எதிர்பார்ப்பு எழுந்துள்ளது. மேலும் இந்த படத்தின் பணிகள் இறுதிக் கட்டத்தை எட்டிவிட்டதால் 'பீஸ்ட்' பொங்கலுக்கு வெளியாகும் என எதிர்பார்க்கப்படுகிறது.

இந்த படத்தை அடுத்து நடிகர் விஜய், எந்த இயக்குநருடன் இணையப் போகிறார் என்ற தகவல் எதுவும் வெளியாகாத நிலையில், நடிகர் விஜய் நடிப்பில் உருவாகும் ‘தளபதி 66’ படம் குறித்த அதிகாரப்பூர்வ அறிவிப்பைப் படக்குழு வெளியிட்டுள்ளது. அதில் ‘தளபதி 66’ படத்தைத் தெலுங்கு திரையுலகின் முன்னணி தயாரிப்பாளரான தில் ராஜு தயாரிப்பில், இயக்குநர் வம்சி இயக்கவுள்ளதாக அறிவிப்பு வெளியாகியுள்ளது.

மேலும் பெயரிடப்படாத இந்தப் படத்திற்கு 'தளபதி 66' என தற்போதைக்கு பெயர் வைக்கப்பட்டுள்ளது. இந்தப் படத்திற்கான பூஜையை ஹைதராபாத்தில் பிரம்மாண்டமாக நடத்தப் படக்குழு திட்டமிட்டுள்ளதாகவும் தகவல் வெளியாகியுள்ளது. 

இந்நிலையில், நடிகர் விஜய் அடுத்தப்படம் குறித்தான அப்டேட் கிடைத்துள்ளதால் ரசிகர்கள் உற்சாகமடைந்துள்ளனர்.