“ஏன் என்ற கேள்வி”
யாமினி எழுதிய “ஏன் என்ற கேள்வி” நூல் கேள்வி கேட்பதன் முக்கியத்துவத்தை விளக்குகிறது. “ஏன் என்ற கேள்வியை கேட்கத் தெரிந்தவர்கள் வாழ்க்கையில் சுலபமாக வெற்றி அடைவார்கள்” என்பதே இந்நூலின் அடிப்படைக் கருத்து. ஆசிரியர் மனிதர்களை மூன்று வகையாகப் பிரிக்கிறார்: என்ன செய்கிறோம் என்று மட்டும் அறிந்தவர்கள்; என்ன, எப்படி செய்ய வேண்டும் என்று அறிந்தவர்கள்; என்ன, எப்படி, ஏன் செய்ய வேண்டும் என்பதை அறிந்தவர்கள். மூன்றாவது வகையினரே வெற்றியாளர்கள். நூல் வாசகர்களை குழந்தைகளைப் போல கேள்வி கேட்க ஊக்குவிக்கிறது, ஆனால் இக்கேள்விகள் அறிவை வளர்ப்பதற்காக மட்டுமே இருக்க வேண்டும், யாரையும் நோகடிப்பதற்கல்ல. ஆசிரியர் சமூகத்தில் உள்ள பாலின பாகுபாடுகளை கேள்விகள் மூலம் எடுத்துக்காட்டுகிறார்: ஏன் பெண் குழந்தைகளுக்கு பிங்க் நிறம்? ஏன் பெண்களுக்கும் ஆண்களுக்கும் வேறுபட்ட பரிசுப் பொருட்கள்? ஏன் பெண்கள் வீட்டுப் பொறுப்பையும் வேலையையும் சேர்த்தே பார்க்க வேண்டும்? இன்றைய கல்வி முறை குழந்தைகளை கேள்வி கேட்காமல் ஏற்றுக்கொள்ளப் பழக்கப்படுத்தி விட்டது என்று கவலைப்படும் ஆசிரியர், குழந்தைகளை கேள்வி கேட்க ஊக்குவிப்பதே அவர்களின் எதிர்காலத்தை சிறப்பாக்கும் என்கிறார். பெண்ணிய எழுத்தாளர் யாமினி எழுதிய இந்நூல் ஹெர் ஸ்டோரிஸ் பதிப்பகத்தால் வெளியிடப்பட்டுள்ளது. விலை: ரூ.80. தொடர்பு: 9600398660.