நாடாளுமன்ற குளிர்கால கூட்டத்தொடர் இன்று தொடக்கம்

நாடாளுமன்ற குளிர்கால கூட்டத்தொடர் இன்று தொடக்கம்

புதுதில்லி, நவ. 30- பரபரப்பான அரசியல் சூழலில் நாடாளுமன்ற குளிர்கால கூட்டத்தொடர் திங்களன்று (டிச., 1) தொடங்குகிறது. டிசம்பர் 19ஆம் தேதி வரை நடைபெறும் இந்த கூட்டத்தொடரில், விடுமுறை நாட்கள் நீங்கலாக 15 அமர்வுகள் இடம்பெற உள்ளன. 12 மாநிலங்களில் நடைபெறும் வாக்காளர் பட்டியல் சிறப்பு தீவிர திருத்தம் (எஸ்ஐஆர்),  தில்லி குண்டு வெடிப்பு, வாக்குத் திருட்டு, தில்லி காற்று மாசு, வேலைவாய்ப்பின்மை உள்ளிட்ட பல்வேறு பிரச்சனைகள் குறித்து அவையில் விவாதிக்க “இந்தியா” கூட்டணிக் கட்சிகள் குளிர்கால கூட்டத்தொடரில் வலியுறுத்தும் என எதிர்பார்க்கப்படுகிறது. மேலும் சிவில் அணுசக்தி துறையில் தனியாருக்கு அனுமதி வழங்குவது, இந்திய உயர்கல்வி ஆணையம் அமைப்பது, பெருநிறுவன சட்டம் மற்றும் பங்குச் சந்தை உள்ளிட்ட 10 மசோதாக்களை தாக்கல் செய்ய ஒன்றிய அரசு திட்டமிட்டுள்ளது. 10 மசோதாக்களில் 4 நிதித்துறை தொடர்புடையவை, 2 சட்டம் மற்றும் நீதித்துறை தொடர்புடையவை. கல்வி, எரிசக்தி, போக்குவரத்து துறை, உள்துறை ஆகியவற்றைச் சேர்ந்த தலா ஒரு மசோதாவும் அடங்கும். அதே போல வந்தே மாதரம் பாடலின் 150ஆவது ஆண்டு கொண்டாடப்படுவதால், அதன் வரலாறு குறித்த விவாதம் நாடாளுமன்றத்தில் நடைபெறும் என எதிர்பார்க்கப்படுகிறது.