மயிலாடுதுறை மாவட்டத்தில் 35,000 ஏக்கரில் சம்பா நெற்பயிர்கள் நீரில் மூழ்கின சிபிஎம்-விவசாய சங்க தலைவர்கள் பார்வையிட்டு ஆய்வு
மயிலாடுதுறை, நவ.30- மயிலாடுதுறை மாவட்டத்தில் தொடர்ந்து மூன்றாவது நாளாக பரவலாக கனமழை பெய்தது. செம்பனார்கோவில் பகுதியில் அதிகபட்சமாக ஞாயிறு காலை வரை 17 சென்டிமீட்டர் மழையும், மாவட்டத்தில் சராசரியாக 12 சென்டிமீட்டர் மழையும் பெய்தது. குறிப்பாக மயிலாடுதுறை மாவட்டத்தில் ஒரு லட்சத்து 70 ஆயிரம் ஏக்கரில் சம்பா நடவு செய்யப்பட்டுள்ள நிலையில், வங்கக்கடலில் நிலை கொண்டுள்ள “டிட்வா’’ புயலால் வெளுத்து வாங்கிய கனமழை காரணமாக தாழ்வான பகுதிகளில் உள்ள விளைநிலங்களில் தண்ணீர் சூழ்ந்துள்ளது. செம்பனார்கோவில், கீழையூர், அப்பராசப்புத்தூர், தலைச்சங்காடு, திருக்கடையூர், கிடங்கல், கிள்ளியூர் கன்னங்குடி, கீழ்மாத்தூர் நல்லாடை, அருவாபடி, கொற்கை முட்டம், சேத்தூர், கொற்றவ நல்லூர் உள்ளிட்ட பல்வேறு பகுதிகளில் 35 ஆயிரம் ஏக்கருக்குமேல் நடவு செய்யப்பட்ட இளம் பயிர்கள் நீரில் மூழ்கியுள்ளது. வடிகால் வாய்க்கால்கள் மற்றும் ஆறுகளில் தண்ணீர் அதிக அளவு செல்வதன் காரணமாக, விவசாய நிலங்களில் இருந்து தண்ணீர் வடிவதில் தாமதம் ஏற்பட்டுள்ளது. திருக்கடையூரில் குடமுருட்டி வாய்க்கால் உடைப்பு ஏற்பட்டதால் விளைநிலங்களை தண்ணீர் சூழ்ந்து 200-க்கும் மேற்பட்ட ஏக்கரில் சம்பா பயிர்கள் நீரில் மூழ்கியுள்ளன. உடனடியாக வாய்க்கால் உடைப்பை சரி செய்ய நடவடிக்கை எடுக்க வேண்டும் என்று விவசாயிகள் கோரிக்கை விடுத்துள்ளனர். மூன்று நாட்களுக்கு மேல் பயிர்கள் தண்ணீரில் மூழ்கி இருந்தால் அழுகும் அபாயம் ஏற்பட்டுள்ள நிலையில், ஏக்கருக்கு 30 ஆயிரம் ரூபாய் வரை செலவு செய்து தற்பொழுது பயிர்கள் தண்ணீரில் மூழ்கியுள்ளதால் விவசாயிகள் வேதனை அடைந்துள்ளனர். தண்ணீரை வடிய வைத்து பயிர்களை காப்பாற்ற நடவடிக்கை எடுக்க வேண்டும் என்றும், பாதிக்கப்பட்ட பயிர்களுக்கு நிவாரணம் மற்றும் இன்சூரன்ஸ் தொகை வழங்குவதுடன், விவசாயிகளின் வங்கி கடனையும் தள்ளுபடி செய்ய வேண்டும் என்று விவசாயிகள் கோரிக்கை விடுத்துள்ளனர். மேலும், தொடர்ந்து பலத்த மழை பெய்தால் விவசாயம் அதிக அளவில் பாதிக்கப்படும் என வேதனையுடன் தெரிவித்துள்ளனர். இந்நிலையில், தலைச்சங்காடு, கீழையூர், அப்பரா சப்புத்தூர் பகுதிகளில் பாதிக்கப்பட்ட பகுதிகளை மார்க்சிஸ்ட் கம்யூனிஸ்ட் கட்சியின் மாவட்டச் செயலாளர் பி.சீனிவாசன், மாநிலக்குழு உறுப்பினர் ஏ.வி. சிங்காரவேலன், மாவட்ட செயற்குழு உறுப்பினர் ஜி. ஸ்டாலின், தமிழ்நாடு விவசாயிகள் சங்க மாவட்டச் செயலாளர் எஸ்.துரைராஜ், மாவட்டத் தலைவர் டி.சிம்சன், செம்பனார்கோவில் ஒன்றியச் செயலாளர் கே.பி.மார்க்ஸ், மாவட்டக்குழு உறுப்பினர் ஐயப்பன் உள்ளிட்டோர் நேரில் பார்வையிட்டு ஆய்வு செய்தனர்.