கோவையில் வீட்டில் ஏற்பட்ட தீ விபத்தில் ஒரே குடும்பத்தைச் சேர்ந்த 3 பேர் உயிரிழந்த சம்பவம் பெரும் சோகத்தை ஏற்படுத்தியுள்ளது.
கோவை உருமாண்டம்பாளையம் ஜோஸ் கார்டன் பகுதியில் வசிக்கும் விஜயலட்சுமி என்பவருக்கு அர்ச்சனா மற்றும் அஞ்சலி என 2 மகள்கள் உள்ளனர். இவரது கணவர் கடந்த 2 வருடங்களுக்கு முன்பு இறந்துவிட்டார். இவர்களின் ஒரு மகள் ஐடி கம்பெனியிலும், மற்றொருவர் பைனான்ஸ் தொழிலும் செய்து வருகிறார்.
இந்நிலையில் இன்று காலை வீட்டின் ஹாலில் இருந்த யூபிஎஸ்சில் ஏற்பட்ட தீ விபத்தில் 3 பேரும் மூச்சுத்திணறி பரிதாபமாக உயிரிழந்தனர். இதைக்கண்ட அக்கம்பக்கத்தினர் தீயணைப்புத் துறையினருக்கு தகவல் தெரிவித்தனர். தகவல் அறிந்து வந்த கவுண்டம்பாளையம் வடக்கு தீயணைப்புத்துறையினர் விரைந்து தீயை அணைத்தனர்.
இதுகுறித்து தீயணைப்புத்துறையினர் கூறும்போது. வீட்டின் ஹாலில் இருந்த யூபிஎஸ்சில் ஏற்பட்ட தீ விபத்து காரணமாக புகை ஏற்பட்டுள்ளது. இதை அணைக்க முயன்றபோது புகையால், சமையல் அறையிலிருந்த அஞ்சலி மற்றும் அவரது அம்மா ஆகியோர் மூச்சு திணறல் ஏற்பட்டு உயிரிழந்தனர். மற்றொரு பெண்ணான அர்ச்சனா படுக்கை அறையில் தூங்கிக்கொண்டிருந்த நிலையில் மூச்சு திணறல் ஏற்பட்டும் உயிரிழந்தார். மேலும் அவர்கள் வளர்த்து வந்த நாயும் மூச்சுத்திணறி உயிரிழந்துள்ளது.
இச்சம்பவம் குறித்து தகவலறிந்து வந்த பெரியநாயக்கன்பாளைம் துணை காவல் கண்காணிப்பாளர் ராஜபாண்டியன், துடியலூர் காவல் ஆய்வாளர் ஞானசேகரன் ஆகியோர் உடல்களை கைப்பற்றி பிரேத பரிசோதனைக்காக கோவை அரசு மருத்துவமனைக்கு அனுப்பி வைத்தனர். இதையடுத்து தடவியல் துறையினரை வரவழைத்து ஆய்வு செய்து வருவதாகவும் தெரிவித்தனர்.