சென்னை நந்தனம் ஒய்.சி.எம்.ஏ மைதானத்தில் 48ஆவது புத்தக கண்காட்சி தொடங்கியது. துணை முதல்வா் உதயநிதி ஸ்டாலின், பள்ளிக் கல்வித் துறை அமைச்சா் அன்பில் மகேஸ் பொய்யாமொழி ஆகியோா் புத்தகக் காட்சியைத் தொடங்கி வைத்தனர்.
இன்று(டிச.27) முதல் ஜனவரி 12-ஆம் தேதி வரை மொத்தம் 17 நாள்களுக்கு புத்தகக் காட்சி நடைபெறும் என்று தெரிவிக்கப்பட்டுள்ளது. 48ஆவது புத்தகக் காட்சியில் மொத்தம் 900 அரங்குகள் இடம்பெற்றுள்ளன. வேலைநாள்களில் பிற்பகல் 2 மணி முதல் இரவு 8.30 மணி வரையிலும், விடுமுறை நாள்களில் காலை 11 மணி முதல் இரவு 8.30 மணி வரையிலும் புத்தகக் காட்சி நடைபெறும். அனைத்து நூல்களும் 10 சதவீத தள்ளுபடியுடன் வாசகா்களுக்கு வழங்கப்படும். மாணவா்களை ஊக்குவிக்கும் வகையில் பேச்சுப் போட்டி, ஓவியப் போட்டிகள் நடைபெற உள்ளன.