சென்னை
தமிழகத்தில் கொரோனாவின் ருத்ரதாண்டவம் இன்னும் குறைந்தபாடில்லை. தினமும் மின்னல் வேகத்தில் பாதிப்பு, பலி எண்ணிக்கை உச்சத்தில் தான் உள்ளது. கடந்த சில நாட்களாக ஆறுதல் அளித்த சென்னையின் கொரோனா பாதிப்பு நிலவரம் மீண்டும் கலக்கத்தை உண்டாக்கி வருகிறது. காரணம் அங்கு தினசரி மீண்டும் ஏறுவரிசையில் பயணித்து வருவது தான்.
இந்நிலையில், தமிழகத்தில் இன்று (ஆக., 22) புதிதாக 5,980 பேர் கொரோனாவால் பாதிக்கப்பட்டுள்ளனர். இதன்மூலம் மொத்த பாதிப்பு 3,73,410 ஆக உயர்ந்துள்ளது. மாநிலத்தின் கொரோனா பலி எண்ணிக்கையில் இன்று சிறிது மாற்றம் ஏற்பட்டுள்ளது. கடந்த சில நாட்களாக தினசரி பலி எண்ணிக்கை 100-யை தாண்டியிருந்த நிலையில், 20 நாட்களுக்கு பிறகு கடந்த 24 மணிநேரத்தில் 80 பேர் பலியாகியுள்ளனர். இதன்மூலம் மொத்த உயிரிழப்பு எண்ணிக்கை 6,319 ஆக அதிகரித்துள்ளது. சிகிச்சையில் இருந்த 5,603 பேர் வீடு திரும்பிய நிலையில், குணமடைந்தவர்களின் மொத்த எண்ணிக்கை 3,13,280 ஆக உயர்ந்துள்ளது.
சென்னை கொரோனா பாதிப்பு - 1,294 (மொத்த பாதிப்பு - 1,24,071)