சென்னை,ஏப்.28- தஞ்சை தமிழ்ப்பல்கலைக்கழகத்தில் ஆளுநர் கலந்து கொண்ட பட்டமளிப்பு விழாவில், பட்டம் பெறச் சென்ற மாணவர் சங்க மாநிலத் தலைவர் அரவிந்தசாமியின் ஆடைகளை களைந்து அத்துமீறிய தஞ்சை மாவட்ட காவல்துறையினர் மீது நடவடிக்கை எடுக்க வேண்டும் என்று வலியுறுத்தி மார்க்சிஸ்ட் கம்யூனிஸ்ட் கட்சியின் மாநிலச் செயலாளர் கே. பாலகிருஷ்ணன் ஏப்ரல் 28 அன்று தமிழ்நாடு காவல்துறை இயக்குநருக்கு (டிஜிபி) கடிதம் எழுதியுள்ளார். அவர் அனுப்பிய கடிதம் வருமாறு: கடந்த 24.4.2023 அன்று தஞ்சை தமிழ்ப் பல்கலைக்கழக வளாகத்தில் அமைந்துள்ள கரிகாலச் சோழன் அரங்கத்தில் நடைபெற்ற பட்டமளிப்பு விழாவில் ஆய்வியல் நிறைஞர் பட்டம் (எம்.பில்) பெறுவதற்காக அரவிந்தசாமி என்ற மாணவர் தனது பெற்றோருடன் முன்கூட்டியே பணம் செலுத்திப் பதிவுசெய்த அடிப்படையில் பங்கேற்றுள்ளார். இவர் இந்திய மாணவர் சங்கத்தின் தமிழ்நாடு மாநில தலைவர். தற்போது திருவாரூரில் உள்ள தமிழ்நாடு பல்கலைக்கழகத்தில் முதுகலை மாஸ் கம்யூனிகேசன் படித்து வருகிறார். முதல் தலைமுறை பட்டதாரியும் ஆவார். 24.4.2023 அன்று காலை 8.30 மணிக்கே அரங்கத்திற்குள் அமர்ந்திருந்த அரவிந்தசாமியை, இந்திய மாணவர் சங்கத் தலைவர் என்பதாலும்,
ஆளுநர் ஆர்.என். ரவி விழாவில் கலந்து கொள்வதில், கருப்புக் கொடி காட்ட வாய்ப்பு இருப்பதாக சந்தேகத்தின் பேரில் அழைத்துச் சென்று தனி அறையில் அடைத்து அவரது உள்ளாடைகளை கழற்றி, வக்கிரப் புத்தியுடன், கருப்புக்கொடி ஒளித்து வைத்துள்ளாரா என சோதனை செய்துள்ளனர். அவரை கடைசி வரை பட்டம் வாங்க அனுமதிக்கவில்லை என்பது மிக மோசமான மனித உரிமை மீறல் நடவடிக்கையாகும். ஆளுநருக்கு பாதுகாப்பு அளிப்பதிலோ - சட்டம் - ஒழுங்கை பாதுகாப்பதிலோ மார்க்சிஸ்ட் கம்யூனிஸ்ட் கட்சி மாறுபடவில்லை. ஆனால், சட்டம் ஒழுங்கு பாதுகாப்பு என்பதன் பெயரால் காவல்துறை சட்டத்தை மீறுவதை ஏற்க இயலாது என்பதைச் சுட்டிக்காட்ட விரும்புகிறேன். ஆளுநர் பட்டமளிப்பு விழா முடித்து சென்றபின், அரவிந்தசாமியின் பட்டம் அங்குள்ள மேஜை மீது வீசப்பட்டு கிடந்துள்ளது. இதுவும் அவரை இழிவுபடுத்தும் நோக்கத்துடன் செய்யப்பட்டதாகவே கருத வேண்டியுள்ளது. அத்துமீறலில் ஈடுபட்ட அதிகாரிகளை - அரவிந்தசாமியால் அடையாளம் காட்டக் கூடிய பெயர் தெரியாத 10க்கும் மேற்பட்ட காவல்துறையினர் மீது உரிய நடவடிக்கை மேற்கொள்ள வேண்டும். இவ்வாறு அதில் தெரிவிக்கப்பட்டுள்ளது.