சென்னை, ஜூன் 16- திருச்சியில் வாலிபர் சங்கத் தலைவர் மீது நடந்த கொலைவெறித் தாக்குதலுக்கு சிபிஎம் கண்டனம் தெரிவித்துள்ளது. தாக்குதலில் ஈடுபட்ட சமூக விரோதக் கும்பலை கைது செய்திட வேண்டுமென தமிழக அரசுக்கு சிபிஎம் வலியுறுத்தியுள்ளது. இதுதொடர்பாக கட்சியின் மாநிலச் செயலாளர் கே.பாலகிருஷ்ணன் விடுத்துள்ள அறிக்கை: தோழர் தவ்பிக் இந்திய ஜனநாயக வாலிபர் சங்கத்தில் தன்னை இணைத்துக் கொண்டு ரத்த தானம் உள்ளிட்டு மக்கள் சேவை நடவடிக்கைகளில் ஈடுபட்டு வருகிறார். இதே பகுதியில் பாஜகவைச் சேர்ந்தவரும், கஞ்சா மற்றும் போதைப் பொருள் விற்பனை, செயின் பறிப்பு, திருட்டு உள்ளிட்ட நடவடிக்கைகளில் வினோத் என்பவன் காவல்துறையினருடன் கைகோர்த்துக் கொண்டு குற்றச் செயல்களில் செயல்பட்டு வருகிறான். சமீபத்தில் போதைப் பழக்கத்திற்கு எதிராக இந்திய ஜனநாயக வாலிபர் சங்கத்தினர்
தமிழ்நாடு முழுவதும் மாபெரும் கையெழுத்து இயக்கத்தில் ஈடுபட்டு வருகின்றனர். தோழர் தவ்பிக்கும் இப்பகுதியில் போதைப் பழக்கத்திற்கு எதிராக தொடர் போராட்டங்களையும், விழிப்புணர்வு இயக்கங்களையும் மக்கள் மத்தியிலும், இளைஞர்கள் மத்தியிலும் பிரச்சாரம் செய்து வருகிறார். இதைப் பொறுத்துக் கொள்ள முடியாத சமூக விரோதக் கும்பலைச் சேர்ந்த வினோத், பாதுஷா மற்றும் அவனது கூட்டாளிகள் தவ்பிக்கை கொடூரமாக வெட்டியுள்ளனர். இச்சம்பவத்தில் ஈடுபட்ட ஐந்து பேரை காவல்துறையினர் கைது செய்துள்ளனர்.ஆனால் இச்சம்பவத்திற்கு மூளையாகச் செயல்பட்ட சமூகவிரோத கும்பலின் தலைவன் வினோத், பாதுஷா, ஆசைத் தம்பி ஆகியோர் கைது செய்யப்படவில்லை. எனவே, இந்த கொடூர குற்றச் சம்பவத்தில் ஈடுபட்ட சமூக விரோதிகள் வினோத், பாதுஷா, ஆசைத்தம்பி ஆகியோரை உடனடியாக கைது செய்து உரிய சட்டப்பிரிவுகளில் வழக்குப் பதிவு செய்து கடும் நடவடிக்கை எடுக்க வேண்டுமெனவும், இப்பகுதியில் போதைப் பொருள் விற்பனையை முற்றிலும் தடுப்பதற்கு காவல்துறை விசாரணையை தீவிரப்படுத்த வேண்டுமெனவும், படுகாயமுற்று ஆபத்தான நிலையில் சிகிச்சைப் பெற்று வரும் தவ்பிக் அவர்களுக்கு உரிய மேல்சிகிச்சை அளிக்க வேண்டுமெனவும் தமிழக அரசையும், தமிழ்நாடு காவல்துறையையும் சிபிஐ (எம்) மாநில செயற்குழு வலியுறுத்துகிறது என்று அவர் தனது அறிக்கையில் கூறியுள்ளார்.