கோழிக்கோடு:
கேரளத்தில் மீண்டும் நிபா மரணம் ஏற்பட்டுள்ளது. கோழிக்கோட்டில் ஞாயிறன்று (செப்.5) அதிகாலை இறந்த 12 வயது சிறுவனுக்கு நிபா நோய் உறுதி செய்யப்பட்டது.
புனே வைராலஜி இன்ஸ்டிடியூட்டிலிருந்து சிறுவனின் பரிசோதனை முடிவுகளைப் பெற்ற பிறகு சனியன்று இரவு சுகாதாரத் துறை உயர்மட்ட கூட்டத்தைக் கூட்டியது. உயர் மட்டக் கூட்டத்தால் உடனடியாக செயல் திட்டம் தயாரிக்கப்பட்டது. வைரஸ் பதிவான பகுதிக்கான சாலைகளை காவல்துறையினர் மூடிவிட்டனர். கோழிக்கோடு தவிர, மலப்புரம் மற்றும் கண்ணூர் மாவட்டங்களில் விழிப்புணர்வு தேவை. கவலைப்பட தேவையில்லை என்று அமைச்சர் கூறினார்.குழந்தையின் மூன்று மாதிரிகள் நேர்மறையானவை என்று கண்டறியப்பட்டதாக சுகாதார அமைச்சர் வீணா ஜார்ஜ் கூறினார். பெற்றோர்கள், உறவினர்கள் மற்றும் அக்கம்பக்கத்தினர் சுகாதாரத் துறையால் கண்காணிக்கப்படுவதாகவும் அமைச்சர் கூறினார். குழந்தையுடன் நெருங்கிய தொடர்பில் இருந்த எவருக்கும் அறிகுறிகள் இல்லை. குழந்தையின் தொடர்பு பட்டியலும் தயாரிக்கப்பட்டுள்ளது.
சிறுவன் காய்ச்சல் காரணமாக நான்கு நாட்களுக்கு முன்பு மருத்துவமனையில் அனுமதிக்கப்பட்டான். அவசர சிகிச்சை பிரிவில் சிகிச்சை பெற்று வந்த குழந்தைக்கு வாந்தி மற்றும் மூளைக்காய்ச்சல் இருந்தது. ஒரே இரவில் நிலைமை மோசமானது. அதிகாலை 4.45 மணிக்கு இறந்தார்.
கட்டுப்பாட்டு அறை திறப்பு
கோழிக்கோட்டில் மீண்டும் நிபா வைரஸ் பாதிப்பு உறுதி செய்யப்பட்டதால், கடுமையான எச்சரிக்கை விடுக்கப்பட்டுள்ளது. சுகாதார அமைச்சர் வீணா ஜார்ஜ் உடன், அமைச்சர்கள் முகமது ரியாஸ், ஏ.கே.சசீந்திரன் மற்றும் அகமது தேவர்கோவில் ஆகியோர் கோழிக்கோடு வந்து பாதுகாப்பு நடவடிக்கையை முன்னெடுத்தனர். காலை 11 மணிக்கு, உயர்மட்டக் கூட்டத்தில் அமைச்சர்கள், மாவட்ட ஆட்சியர்கள் மற்றும் அதிகாரிகள் கலந்து கொண்டனர். கோழிக்கோடு மருத்துவக் கல்லூரியில் நிபா வார்டு திறக்கப்பட்டது. அங்கு நோய் அறிகுறியுடன் சுகாதாரத்துறை ஊழியர்கள் இருவர் அனுமதிக்கப்பட்டுள்ளனர்.
நிபா தொற்று நோயால் இறந்த 12 வயது சிறுவனின் தொடர்பு பட்டியலை சுகாதாரத்துறை தொகுத்துள்ளது. உறவினர்கள் மற்றும் அருகில் உள்ளவர்கள் உட்பட 158 பேரின் பட்டியல் தயாரிக்கப்பட்டுள்ளது. இதில் 17 பேர் குழந்தையுடன் நேரடியாக தொடர்பு கொண்டவர்கள். அவர்கள் தீவிரமாக கண்காணிக்கப்படுகிறார்கள். முதன்மை தொடர்பு பட்டியலில் உள்ள யாருக்கும் எந்த அறிகுறிகளும் இல்லை என்று சுகாதார அமைச்சர் கூறினார். நோய்க்கான காரணம் ஆராயப்பட்டு வருகிறது. பரவுவதைத் தடுப்பதே முதல் முன்னுரிமை என்று அமைச்சர் கூறினார்.