திருவனந்தபுரம்:
அரசுப் பணியாளர் தேர்வாணையத்தை (பிஎஸ்சி) செயல்பட விடாமல் கேரளத்தில் புறவாசல் நியமனங்கள் நடக்கிறது என்ற எதிர்க்கட்சிகளின் குற்றச்சாட்டு ஆதாரமற்றது முதல்வர் பினராயி விஜயன் கூறியுள்ளார்.
இதுகுறித்து செய்தியாளர்களுக்கு அளித்த பேட்டியில் பினராயி விஜயன் மேலும் கூறியிருப்பதாவது:
நான்கு ஆண்டுகள் ஏழு மாதங்களில் இந்த அரசாங்கம் யுடிஎப் அரசாங்கத்தை விட அதிகமான தரவரிசைப் பட்டியலை வெளியிட்டுள்ளது. காவல்துறையில் 13825 நியமனங்கள் செய்யப்பட்டன. யுடிஎப் ஆட்சியின் போது, வெறும் 4791 நியமனங்கள் மட்டுமே நடந்தன. எல்டிஎப் ஆட்சியில் எல்டிசி-யில் 19120 நியமனங்கள். என்றால், யுடிஎப் காலத்தில் இது 17,711 மட்டுமே ஆகும். 1,57,990 நியமன பரிந்துரைகள் இந்த ஆட்சி காலத்தில் பிஎஸ்சி மூலம் செய்யப்பட்டுள்ளன. 44,000 புதிய பதவிகள் உருவாக்கப்பட்டுள்ளன. முக்கிய பதவிகளுக்கான புள்ளிவிவரங்களைப் பார்த்தால் இது தெளிவாகிவிடும்.
காவல்துறை: யுடிஎப் -4796, எல்டிஎப் -13825. எல்பிஎஸ்ஏ (எல்பி பள்ளி உதவியாளர்): யுடிஎப் -1630, எல்டிஎப் -7322. யுபிஎஸ்ஏ (யுபி பள்ளி உதவியாளர்): யுடிஎப் -802, எல்டிஎப் -4446. பணியாளர்கள் செவிலியர் சுகாதாரம்: யுடிஎப் (1608), எல்டிஎப் (3607). உதவி அறுவை சிகிச்சை சுகாதாரம்: யுடிஎப் (2435), எல்டிஎப் (3324), செவிலியர் மருத்துவம்: யுடிஎப் -924, எல்டிஎப் -2200. இது தவிர, பழங்குடி சமூகத்தைச் சேர்ந்தவர்கள் சிறப்பு காவல்துறை மற்றும் கலால் துறைகளில் நியமனங்கள் செய்யப்பட்டுள்ளனர்.
இந்த உண்மையை மறைத்து, தரவரிசை பட்டியலில் உள்ள அனைவருக்கும் நியமனம் வழங்கப்பட வேண்டும் என்று கூறப்படுகிறது. இது நடைமுறை சாத்தியம் என்று முன்னாள் முதல்வரால் சொல்ல முடியுமா? அதேபோல ஜூன் 2020 இல் காலாவதியாகும் சிபிஓ தரவரிசை பட்டியல் புதுப்பிக்கப்பட வேண்டும் என்பதும் அவர்களின் ஒரு கோரிக்கை. காலாவதியான பட்டியலை எவ்வாறு புதுப்பிப்பது?. நாட்டில் இதுபோன்ற சட்டம் ஏதேனும் உள்ளதா? அரசியல் ஆதாயத்திற்காக அசிங்கமான நடவடிக்கையில் ஈடுபடுவது சரிதானா? பிஎஸ்சி மூலம் வேலை தேடுவோர் இந்த நாட்டின் சந்ததியினர். அவர்களுக்கு இயன்றதைச் செய்வதே எல்டிஎப் அரசின் அணுகுமுறை.இவ்வாறு பினராயி விஜயன் கூறியுள்ளார்.
***********************
அரசுப் பள்ளியில் சேர்ந்த 6 லட்சம் மாணவர்கள்
முன்னாள் முதல்வர் உம்மன் சாண்டி வேலைதேடுபவர்களின் காலடியில் விழுந்து வேலை நியமனதடை விதித்தமைக்காக மன்னிப்பு கோர வேண்டும்.ஏனெனில் எல்லா துயரங்களையும் ஏற்படுத்தியவர் அவர்தான் என்று கேரள முதல்வர் பினராயி விஜயன் குற்றம் சாட்டியுள்ளார். “மத்திய அரசு ஆட்சேர்ப்புக்கு தடை விதித்ததன் ஒரு பகுதியாக, 8 லட்சத்துக்கும் மேற்பட்ட இளைஞர்கள் கேரளத்தில் வேலை இழந்துள்ளனர். ஆனால் இதுபோன்ற கொள்கைகளுக்கு எதிராகப் பேசாதவர்கள், மாநில அரசு மீது தேர்தலுக்கு முன்னதாக திடீர் குற்றச்சாட்டுக்களை சுமத்துகிறார்கள்.2002-இல் கோவளத்தில் கூடிய யுடிஎப் ஒருங்கிணைப்புக் குழு கூட்டம், அப்போதைய அரசாங்கத்திற்கான பதவிகளைக் குறைத்தும் நியமனங்களை தடை செய்யவும் பரிந்துரைத்தது. உம்மன்சாண்டி அப்போது யுடிஎப் கன்வீனராக இருந்தார். இதைத் தொடர்ந்து கேரளாவில் 32 நாள் நீண்ட வேலைநிறுத்தம் நடைபெற்றது. அப்போது, குழந்தைகளுக்கு இலவசமாக கல்வி கற்பிப்பார்கள் என்றுயாரும் கனவுகாணக்கூடாது என்று பேசியவர்தான் உம்மன் சாண்டி.ஆனால், எங்களின் எல்டிஎப் அரசு, தனது ஆட்சிக் காலத்தில் 6 லட்சத்துக்கும் மேற்பட்ட மாணவர்கள்அரசுப் பள்ளிகளில் சேருவதற்கு வழிவகுத்துள்ளது”என்று பினராயி விஜயன் குறிப்பிட்டுள்ளார்.