புதுதில்லி,ஏப்.03- வக்பு சட்ட திருத்த மசோதா நிறைவேற்றப்பட்டதற்கு மதுரை எம்.பி சு.வெங்கடேசன் கடும் கண்டங்களை தெரிவித்துள்ளார்.
இதுகுறித்து அவர் தனது எக்ஸ் தளத்தில் பதிவிட்டுள்ளாதாவது;
நேற்று நள்ளிரவு இரண்டு மணி அளவில் மக்களவையில் வக்பு வாரிய திருத்த மசோதா நிறைவேற்றப்பட்டது. சுமார் 10 மணி நேரத்துக்கும் மேலாக நடைபெற்ற விவாதத்தில் ஆளும் கட்சியின் தரப்பில் பேசிய பலரும் வெறுப்பை கக்கித் தீர்த்தார்கள்.
எந்த வெறுப்புணர்வும், பேதங்களும், பிரிவினை ஏற்படுத்திய காயங்களும் மக்கி மண்ணோடு மறைய வேண்டுமென இந்திய சமூகம் தொடர்ந்து முயன்று வந்ததோ, அவற்றையெல்லாம் மீண்டும் கிளறி தேசத்தின் தலைப்பு செய்தியாக்கும் அரசியலை பாஜக செய்து முடித்தது.
அடுத்து வரும் நாட்களில் அவைகள் நாட்டின் எல்லா பகுதிகளுக்கும் கொண்டு சேர்க்கப்படும். இன்று இஸ்லாமியர்களுக்கு நேர்வதே நாளை கிருஸ்துவர்களுக்கும். நாளை மறுநாள் பட்டியலினம், மற்றும் பழங்குடியினருக்கும். அதற்கு மறுநாள் பிற்பட்டோருக்கும்.
பாஜகவினருக்குத் தேவை கடந்த காலத்தின் துர்நாற்றம். எனவே அவற்றையே முழுநேரமும் சுவாசிக்க நினைக்கிறார்கள். நமக்கு தேவை நிகழ்காலத்துகான நல்வாழ்வும், எதிர்காலத்துக்கான நற்கனவும்.
பழைய பேய்களை நம் கனவுகளின் மீதும், சிந்தனையின் மீதும் ஏவிவிடும் பத்தாம்பசலிகளுக்கு எதிராக சலிப்பின்றி போரிடுவோம். என அவர் குறிப்பிட்டுள்ளார்.
