வக்பு சட்டத்திருத்த மசோதாவுக்கு எதிராக உச்ச நீதிமன்றத்தில் காங்கிரஸ் கட்சி சார்பில் வழக்கு தொடரப்பட்டுள்ளது.
வக்பு வாரிய சட்டத்திருத்த மசோதாவை மக்களவையில் ஆகஸ்ட் 8-ஆம் தேதி ஒன்றிய பாஜக அரசு தாக்கல் செய்தது. இது வக்பு சொத்துக்களைச் சூறையாடுவதற்கான சதித் திட்டம் என்று எதிர்க்கட்சிகள் கடும் எதிர்ப்பு தெரிவித்த பின்னணியில், மசோதா நாடாளுமன்ற கூட்டுக்குழு ஆய்வுக்கு அனுப்பப்பட்டது. கூட்டுக்குழுவில் ஆய்வு நடத்தப்பட்டு, பின்னர் பா.ஜ.க கூட்டணி கட்சிகளின் உறுப்பினர்கள் அளித்த 14 திருத்தங்களை மட்டுமே பாஜக எம்.பி. ஜெகதாம்பிகா பால் தலைமையிலான நாடாளுமன்றக் கூட்டுக் குழுவால் ஏற்கப்பட்டது. எதிர்க்கட்சிகள் முன்வைத்த 44 திருத்தங்கள் நிராகரிக்கப்பட்டுள்ளது. எதிர்க்கட்சிகளின் கடும் எதிர்ப்பையும் மீறி வக்பு வாரிய சட்டத்திருத்த மசோதாவுக்கு நாடாளுமன்ற கூட்டுக்குழு ஒப்புதல் அளித்தது.
இதை தொடர்ந்த கடந்த ஏப்ரல் 2-ஆம் தேதியன்று, வக்பு வாரிய சட்டத்திருத்த மசோதாவை மக்களவையில் ஒன்றிய நாடாளுமன்ற விவகார மற்றும் சிறுபான்மையினர் நலத்துறை அமைச்சர் கிரண் ரிஜிஜு தாக்கல் செய்தார். இதை தொடர்ந்து விவாதம் நடத்தப்பட்டு ஏப்ரல் 3-ஆம் தேதி நள்ளிரவு 2.30 மணிக்கு மக்களவையில் வாக்கெடுப்பு மூலம் நிறைவேற்றப்பட்டது. இதனை தொடர்ந்து மாநிலங்களவையில் இம்மசோதா நேற்று தாக்கல் செய்யப்பட்டது. அதன் மீதும் விவாதம் நடத்தப்பட்டு இன்று நள்ளிரவு 2 மணி அளவில் வாக்கெடுப்பு மூலம் நிறைவேற்றப்பட்டது. இந்த மசோதா ஜனாதிபதி திரௌபதி முர்மு ஒப்புதலுக்காக அனுப்பப்பட்டுள்ளது.
இந்த நிலையில், இம்மசோதாவுக்கு எதிராக உச்ச நீதிமன்றத்தில் காங்கிரஸ் கட்சி சார்பில் வழக்கு தொடரப்பட்டுள்ளது. வக்பு சட்டத்திருத்த மசோதா, முஸ்லிம் சமூகத்தின் மீது பாகுபாடு காட்டுவதாகவும், அவர்களின் அடிப்படை உரிமைகளை பறிப்பதாகவும் உள்ளது என குறிப்பிட்டு காங்கிரஸ் எம்.பி முகமது ஜாவேத் உச்ச நீதிமன்றத்தில் மனுத் தாக்கல் செய்துள்ளார்.
