சென்னை முக்கிய செய்திகள்

கொடுங்கையூர், பெருங்குடி குப்பை கிடங்குகள்  தீப்பற்றி எரியாமல் தடுக்க நடவடிக்கை 

சென்னை, ஏப். 26- சென்னையில் வெப்பத்தின் தாக்கம்  அதிகரித்து வருவதால், குப்பை கிடங்குகளில் தீ விபத்து ஏற்படாமல் தடுக்க மாநகராட்சி முன் எச்சரிக்கை நடவடிக்கைகளை மேற்கொண்டுள்ளது. சென்னை நகரில் சேகரிக்கப்படும் குப்பைகள் கொடுங்கையூர், பெருங்குடி ஆகிய இரண்டு கிடங்குகளுக்கு கொண்டு  செல்லப்படுகிறது. தினமும் 5 ஆயிரம் மெட்ரிக் டன் குப்பை நகரின் பல்வேறு பகுதி களில் இருந்து சேகரித்து தரம் பிரிக்கப்படு கிறது. இந்த குப்பை கிடங்குகளில் மலை  போல் குவிந்திருக்கும் குப்பைகள் சுட்டெரிக்கும் வெயிலால் தீப்பிடித்து எரிவதையோ, சிறு தீப்பொறி மூலம் விபத்து ஏற்படுவதையோ தடுக்க பாதுகாப்பு நடவடிக்கை எடுக்கப்பட்டுள்ளது. ஜூன் மாதம் வரை குப்பை கிடங்குகளில் உள்ள குப்பைகளில் தண்ணீர் தெளிப்பது உள்ளிட்ட நடவடிக்கைகள் தொடரும் என்று திடக்கழிவு மேலாண்மை கண்காணிப்பு பொறியாளர் பாலமுரளி தெரிவித்தார். 2018 மற்றும் 2022ஆம் ஆண்டுகளில் இந்த  இரண்டு கிடங்குகளிலும் பெரும் தீ விபத்து கள் ஏற்பட்டுள்ளன. இதையடுத்து 3 லட்சம் லிட்டர் கொள்ளளவு கொண்ட தண்ணீர் தொட்டி 2 கிடங்கிலும் கட்டப்பட்டு தண்ணீர் சேமித்து வைக்கப்பட்டுள்ளது.  மாநகராட்சி லாரிகள் மூலம் தொட்டிக்கு தண்ணீர் கொண்டு வரப்படுகிறது. குப்பை  குவியல்களுக்கு இடையே 3 மீட்டர் அகலமுள்ள வழித்தடங்களும் தீ பரவாமல் தடுக்க அமைக்கப்பட்டுள்ளது. வெயில் தாக்கத்தை பொறுத்து ஒரு நாளைக்கு 2 முறை அல்லது அதற்கு மேல் தண்ணீர் தெளிக்கப்படுகிறது என்று அதிகாரி தெரிவித்தார். இது தவிர தீயணைப்பு வாகனங்கள் அங்கு தயார் நிலையில் நிறுத்தப்பட்டுள்ளன. மேலும் பீடி, சிகரெட் துண்டுகளால் ஏற்ப டும் தீ விபத்தை தடுக்க மாநகராட்சி ஊழியர்கள் அந்த பகுதியில் தீவிரமாக கண்காணிக்கிறார்கள். குப்பை கிடங்கில் புகை ஏற்பட்டால் உடனடியாக அதனை அணைக்க அறிவுறுத்தப்பட்டுள்ளது. கோடை காலம் முடியும் வரை குப்பை கிடங்குகள் தீவிரமாக கண்காணிக்கப்படும் என்றும் அதிகாரி தெரிவித்தார்.

கழிவறையில் இருந்து  மீட்கப்பட்ட  ரூ. 85 லட்சம் மதிப்பிலான தங்கம்

சென்னை, ஏப். 26- சென்னை விமான நிலைய கழிவறையில் கேட்பாரற்று கிடந்த ரூ.85 லட்சம் மதிப்பிலான தங்கம் பறிமுதல் செய்யப்பட்டது.   வெளிநாடுகளில் இருந்து சென்னைக்கு தங்கம், போதைப் பொருட்கள் கடத்தி வருவது சமீப காலமாக அதிகரித்து வருகிறது.  இந்நிலையில் சென்னை மீனம்பாக்கம் பன்னாட்டு விமான நிலையத்தில் தங்கம் கடத்தி  வருவதாக அதிகாரிகளுக்கு ரகசியத் தகவல் கிடைத்தது. அதன்பேரில் சுங்கத்துறையினர் தீவிர கண்காணிப்பில் ஈடுபட்டிருந்தனர்.  அப்போது விமான நிலைய கழிவறையில் கேட்பாரற்று ஒரு பார்சல் கிடப்பதாக ஒன்றிய தொழில் பாதுகாப்பு படை யினருக்கு துப்புரவு தொழிலாளர்கள் தகவல் தெரிவித்த னர். இதையடுத்து அங்கு வந்த அதிகாரிகள், கழிவறையில்  கிடந்த மர்ம பார்சலில் வெடிகுண்டு இருக்குமோ? என்ற சந்தேகத்தில் சோதனை செய்த போது, தங்கக் கட்டிகள் இருப்பது தெரிய வந்தது. சுமார் ரூ.85 லட்சம் மதிப்புள்ள இதையடுத்து 1.25 கிலோ கடத்தல் தங்கக் கட்டிகளை பறிமுதல் செய்த சுங்க இலாகா அதிகாரிகள், தங்கக் கட்டிகளை கடத்தி வந்து கழிவறையில் போட்டுச் சென்றது யார்? என்பது குறித்து விசாரணை நடத்தி வருகின்றனர்.

புழலில் கஞ்சா விற்றவர் கைது

சென்னை, ஏப். 26- சென்னை புழல் காவாங்கரை மீன் மார்க்கெட் அருகே ஆட்டோவில் கஞ்சா விற்பனை செய்யப்படுவதாக புழல் காவல் நிலையத்திற்கு ரகசியத் தகவல் கிடைத்தது. உடனே காவல் துறையினர் சம்பவ இடத்திற்கு மாறுவேடத்தில் சென்று கண்காணிப்பில் ஈடுபட்டனர். அப்போது அங்கு நிறுத்தி வைக்கப்பட்டிருந்த ஒரு ஆட்டோவில் இருந்து ஒருவர்  கஞ்சா விற்பனை செய்து கொண்டிருந்தார். உடனே அந்த நபரையும், ஆட்டோவையும் பறிமுதல் செய்து காவல் நிலையம் கொண்டு சென்று விசாரணை நடத்தினர். விசாரணையில் அவர் திருநீலகண்டநகர் பிரதான சாலையைச் சேர்ந்த முத்து ராஜா (26) என்பது தெரியவந்தது. பின்னர் அவரது வீட்டிற்கு சென்று சோதனை  செய்த போது, அங்கு  ஒன்றரை கிலோ கஞ்சா இருப்பது  கண்டு பிடிக்கப்பட்டது. இதையடுத்து அந்த கஞ்சாவையும் காவல் துறையினர் பறிமுதல் செய்தனர். பின்னர் அவரை நீதிமன்றத்தில் ஆஜர்படுத்தி சிறையில் அடைத்தார்.

தங்கம் விலை உயர்வு
சென்னை, ஏப்.26- சென்னையில் ஆபரணத்தங்கத்தின் விலை வரலாறு காணாத வகையில் உயர்ந்த வண்ணம் இருந்து வருகிறது.  இருப்பினும் நேற்று சவரனுக்கு ரூ.160 குறைந்து ஒரு சவரன் ரூ.53,680-க்கு விற்பனையானது. இந்நிலையில் வெள்ளியன்று (ஏப்,26) ஆபரணத்தங்கம் விலை சவரனுக்கு ரூ.360 உயர்ந்து ஒரு சவரன் ரூ. 54,040-க்கும் கிராமுக்கு ரூ.45 உயர்ந்து ஒரு கிராம் ரூ. 6,755-க்கும் விற்பனையாகிறது. வெள்ளி விலையும் உயர்ந்துள்ளது. கிராமுக்கு 2 ரூபாய் உயர்ந்து ஒரு கிராம்  ரூ.88-க்கும் பார் வெள்ளி ரூ.88ஆயிரத்துக்கும் விற்பனை செய்யப்படுகிறது.

திருச்சி - விருத்தாசலம் பயணிகள் ரயில்  மே. 2 முதல் விழுப்புரம் வரை நீட்டிப்பு
ரயில்வே நிர்வாகத்திற்கு ரவிக்குமார் எம்.பி நன்றி

விழுப்புரம்,ஏப்.26- திருச்சி - விருத்தாசலம் பயணிகள் ரயில் விழுப்புரம் வரை நீட்டிக்கப்பட்டதற்கு விழுப்புரம் மக்களவை உறுப்பினர் துரை.ரவிக்குமார் ரயில்வே துறைக்கு நன்றி தெரிவித்துள்ளார். இது குறித்து அவர் வெளியிட்டுள்ள செய்தி குறிப்பில், திருச்சி - விருத்தாசலம் பய ணிகள் ரயிலை விழுப்புரம் வரை நீட்டிக்க வேண்டும் எனத் தொடர்ந்து ரயில்வே நிர்வாகத்தை பொதுமக்கள் சார்பில் வலியுறுத்தினேன். திருச்சியில் நடை பெற்ற எம்.பிக்கள் கூட்டத்தில் ரயில்வே துறை பொது மேலாளரிடம் தனிப்பட்ட முறை யிலும் இதை எடுத்துக் கூறினேன். அதன் பயனாக வரும் மே 2 ஆம் தேதி முதல் திருச்சி - விருத்தாசலம் பயணிகள் ரயில் விழுப்புரம் வரை நீட்டித்து ரயில்வே நிர்வாகம் உத்தரவிட்டுள்ளது மகிழ்ச்சி அளிக்கிறது. அதற்கு விழுப்புரம் பகுதி மக்கள் சார்பில் எனது நன்றியைத் தெரி வித்துக் கொள்கிறேன் என அவர் தெரி வித்துள்ளார். இந்த ரயில் தினமும் மாலை 6 மணிக்கு திருச்சியிலிருந்து புறப்பட்டு இரவு 9 மணிக்கு விருத்தாசலம் வந்தடையும் இந்த பயணிகள் ரயில் உளுந்தூர்பேட்டை, பரிக்கல், திருவெண்ணெய்நல்லூர் ஸ்டேஷன்களில் நின்று இரவு 10.30 மணிக்கு விழுப்புரம் வந்து சேரும். அதி காலை 5.10 மணிக்கு மீண்டும் புறப்பட்டு அதே வழியில் காலை 9 மணிக்கு திருச்சிக்கு சென்று சேரும் என்பது குறிப்பிடத்தக்கது.

2 பெண்கள் உள்பட 5 பேரை கொல்ல முயற்சி: ஆவடி அருகே  2 ரவுடிகள் கைது

அம்பத்தூர், ஏப்.26- ஆவடி அருகே அடுக்கு மாடி குடி யிருப்பில் மதுப்போதையில் 2 பெண்கள் உள்பட 5 பேரை வெட்டி கொல்ல முயன்ற 2 ரவுடிகளை போலீஸார் வெள்ளிக்கிழமை கைது செய்தனர். அம்பத்தூர் அடுத்த திருமுல்லை வாயல், கணபதி நகர், கணபதி தெருவில் அடுக்கு மாடி குடியிருப்பு உள்ளது. இந்த குடி யிருப்பில் செங்கல்பட்டு, காரைவாக்கம் பகுதியைச் சேர்ந்த விஷ்ணு (22) திருப்போரூர், ஸ்ரீகுண்டம் பகுதியைச் சேர்ந்த அவினாஷ் (27) மற்றும் தாம்பரம் அருகே படப்பை பகுதியைச் முத்துக்குமார் (26) உள்ளிட்டோர் வருகின்றனர். இந்த நிலையில் வியாழக்கிழமை மேற்கண்ட 3 இளைஞர்களும் மதுப்போதையில் குடி யிருப்பில் உள்ள பெண்களைப் பற்றி அவதூறாகப் பேசி உள்ளனர். இதை யடுத்து அங்கு குடியிருக்கும் செல்வம் மனைவி சீதாலட்சுமி (38), அவரது மகன் காமேஷ் (17) ஆகியோர் கண்டித்துள்ள னர். அப்போது போதையில் இருந்த 3 இளைஞர்களும் தாய், மகனை கத்தியால் வெட்டியுள்ளனர். இதைப் பார்த்த அங்கு வசிக்கும் சந்திரலேகா (38) அவரது மகன் விஜி (20) மற்றும் கல்லூரி மாணவர் காமேஷ் (19) ஆகியோரும் ஓடி வந்து தடுத்துள்ளனர். அப்போது அவர்கள்  3பேரையும்  இளைஞர்கள் கத்தியால் வெட்டியுள்ளனர். இதனால் குடி யிருப்பில் பரபரப்பு ஏற்பட்டது. மேலும் குடியிருப்புவாசிகள் திரண்டு வரவே, போதை இளைஞர்கள் கத்தியுடன் அங்கி ருந்து தப்பி ஓடிவிட்டனர். இதன் பிறகு,  குடியிருப்புவாசிகள் படுகாயம் அடைந்த  5 பேரையும் மீட்டு அரசு மற்றும் தனியார் மருத்துவமனையில் சிகிச்சைக்காக கொண்டு சேர்த்தனர். அங்கு அவர்களுக்கு மருத்துவர்கள் தீவிர சிகிச்சை அளித்து வருகின்றனர். தகவல் அறிந்து திருமுல்லைவாயல் போலீஸார் சம்பவ இடத்துக்கு வந்து தீவிர விசாரணை நடத்தினர். அதில்  தாக்குதலில் ஈடுபட்ட அவி னாஷ், விஷ்ணு ஆகியோர் மீது செங்கல்பட்டு மாவட்டத்தில் கொலை, கொலை முயற்சி உள்ளிட்ட வழக்குகள் இருப்பதும், இவர்கள் இருவரும் ரௌடி பட்டியலில் இடம் பெற்று இருப்பதும் தெரியவந்தது.  புகார் அடிப்படையில் காவல் ஆய்வாளர் கிருஷ்ணன் தலைமையில் போலீஸார் கொலை முயற்சி வழக்கு ரவுடிகள்  அவினாஷ், விஷ்ணு ஆகிய இருவரை யும் வெள்ளிக்கிழமை கைது செய்த னர். பின்னர் அவர்களை அம்பத்தூர் நீதி மன்றத்தில் ஆஜர்படுத்தி புழல் சிறையில் அடைத்தனர். மேலும் இந்த வழக்கு தொடர்பாக தலைமறை வாகியுள்ள முத்துக் குமாரை போலீஸார் தேடி வருகின்றனர்.

லஞ்ச ஒழிப்புத்துறை சோதனையில்  முக்கியமான ஆவணங்கள் சிக்கின

கடலூர்,ஏப்.26- செயல் அலுவலர், ஊராட்சி உதவி இயக்குநர், ஆய்வாளர் உள்ளிட்ட மூன்று பேரின் வீடுகளில் லஞ்ச ஒழிப்பு போலீசார் வெள்ளியன்று  நடத்திய அதிரடி சோதனையில் பல கோடி ரூபாய்க்கான ஆவணங்கள் சிக்கி உள்ளன. சேத்தியா தோப்பு தேர்வு நிலை பேரூராட்சி அலு வலகத்தில் புதனன்று (ஏப்.24) நடைபெற்ற திடீர் ஆய்வின் தொடர்ச்சியாக தேர்வு நிலை பேரூராட்சி செயல் அலுவலர் ஸ்ரீனிவாசன், மற்றும் உள்ளூர் தணிக்கை குழு உதவி இயக்குநர் பூங்குழலி, மற்றும் ஆய்வாளர் விஜய லட்சுமி ஆகியோர்கள் மீது கடலூர் ஊழல் தடுப்பு மற்றும் கண்காணிப்பு பிரிவில் வழக்கு பதிவு செய்து அதன் தொடர்ச்சியாக வெள்ளியன்று 3 பேரின்  வீடுகள் அமைந்துள்ள கடலூர் மற்றும் வடலூர் வீடுகளில் சோதனை செய்யப்பட்டது. இந்த சோதனையின் போது அதிக மதிப்புடைய சொத்து தொடர்பான  நிறைய ஆவணங்கள், வங்கி பெட்டக சாவிகள்,  தங்க பத்திரங்கள் ஆகியவை கைப்பற்றப்பட்டன. மேலும் இது தொடர்பாக விசாரணை மேற்கொள்ளப்பட்டு வருகிறது என்று லஞ்ச ஒழிப்பு போலீசார் தெரிவித்துள்ளனர்.

சுதந்திர தின அருங்காட்சியகம்: அரிய பொருட்களை வழங்க  பொது மக்களுக்கு அரசு அழைப்பு

சென்னை,ஏப்.26- சென்னை மெரினா கடற்கரையின் எதிரில், பாரம்பரியக் கட்டடமான ஹுமாயூன் மஹால் கட்டிடத்தில் சுமார் 80,000 சதுர அடி பரப்பளவில் பெரிய அளவில் சுதந்திர தின அருங்காட்சியகம் அமைக்கப்பட உள்ளது. இதற்கு, பொதுமக்கள் தங்கள் வசம் உள்ள அரிய பொருட்களை சென்னை அல்லது 23 மாவட்ட அருங்காட்சியகங்களுக்கு நேரடியாக வந்து வழங்கலாம் என்று தமிழக அரசு தெரிவித்துள்ளது. இது தொடர்பாக அருங்காட்சியகங்கள் துறை ஆணையர் வெளியிட்டுள்ள செய்திக் குறிப்பு வருமாறு:- இந்தியாவின் சுதந்திரப் போராட்டத்தில் தமிழர்களின் பங்கு மகத்தானது. விடுதலைப் போராட்டத்தில் தமிழகத்தின் தியாகத்தையும் பங்களிப்பையும் போற்றும் வகையில் சுதந்திர தின அருங்காட்சியகம் அமைக்கப்படும் என்று தமிழக முதல்வர் மு.க.ஸ்டாலின், 75 வது சுதந்திர தின விழா உரையின் போது அறிவித்துள்ளார். சென்னை மெரினா கடற்கரையின் எதிரில், பாரம்பரியக் கட்டடமான ஹுமாயூன் மஹால் கட்டிடத்தில் சுமார் 80,000 சதுர அடி பரப்பளவில் பெரிய அளவில் இந்த அருங்காட்சியகம் அமைக்கப்படவுள்ளது. இந்த அருங்காட்சியகம் சிறப்பாக அமைந்திட அனைத்து தரப்பு மக்களின் பங்களிப்பும் தேவைப்படுகிறது. பொது மக்கள் தங்கள் வசம் உள்ள சுதந்திரப் போராட்டம் குறித்த பழங்கால ஆவணங்கள், கையெழுத்துப் பிரதிகள், செய்தித்தாள்கள், ஜெயில் வில்லைகள், ராட்டைகள், பட்டயங்கள், ஐ.என்.ஏ சீருடைகள், ஐ.என்.ஏ. அஞ்சல் தலை மற்றும் ரூபாய் நோட்டுகள் போன்ற இனங்களை நன்கொடையாக அளிக்கலாம். தங்கள் வசம் உள்ள அரிய பொருட்களை சென்னை அல்லது 23 மாவட்ட அருங்காட்சியகங்களுக்கு நேரடியாக சென்று வழங்கலாம். இவ்வாறு வழங்கப்படும் பொருட்களுக்கு உரிய ஒப்புகை கடிதம் மற்றும் பாராட்டுச் சான்றிதழ் அருங்காட்சியக ஆணையரால் வழங்கப்படும். இவ்வாறான அரிய பொருட்கள் பொதுமக்கள் பார்வைக்கு வைக்கப்படும் போது அதை வழங்கியவர்களின் பெயர்களும் இடம்பெறும். ஆகவே, பொதுமக்கள் தங்களிடம் உள்ள சுதந்திரப் போராட்டம் தொடர்பான அரும்பொருட்கள் அமைய உள்ள வரலாற்று சிறப்புமிக்க அருங்காட்சியகத்துக்கு நன்கொடையாக வழங்கக் கேட்டுக் கொள்ளப்படுகிறது என்று அதில் தெரிவிக்கப்பட்டுள்ளது.

பூத் ஏஜென்ட் பணம் எங்கே? பா.ஜ.க செயலாளருக்கு கொலை மிரட்டல்

சென்னை,ஏப்.26- தென் சென்னை மக்களவை தொகுதி யில் பா.ஜ.க வேட்பாளராகத் தமிழிசை சவுந்தரராஜன் போட்டியிட்டார். ஏப்.19 ஆம் தேதி வாக்குப்பதிவு நடை பெற்றபோது பா.ஜ.க கட்சி நிர்வாகிகள் பூத் ஏஜெண்டாக பணியாற்றினார்கள். இந்நிலையில் பூத் ஏஜெண்டாக பணி யாற்றியதற்குப் பணம் தரவில்லை என கூறி தென் சென்னை கிழக்கு மாவட்ட பொதுச் செயலாளருக்கு பா.ஜ.க நிர்வாகி களே கொலை மிரட்டல் விடுத்த சம்பவம் பரபரப்பை ஏற்படுத்தியுள்ளது. தென் சென்னை கிழக்கு மாவட்ட பா.ஜ.க பொதுச் செயலாளராக இருப்ப வர் முத்து மாணிக்கம். இவர் கடந்த 20 ஆம் தேதி துரைப்பாக்கம் மேட்டுக் குப்பத்தில் உள்ள பாஜக மண்டல தலை வர் ஜெகநாதன் வீட்டில் தேர்தல் பணி குறித்து கட்சி நிர்வாகிகளுடன் பேசிக் கொண்டிருந்தார். அப்போது அங்கு வந்த பா.ஜ.கவை சேர்ந்த டிக்காராம், வெங்கட், மாரியம்மாள் உட்பட 5 பேர் பூத் ஏஜெண்டாக பணியாற்றியதற்கு ஏன் பணம் கொடுக்கவில்லை என கூறி வாக்கு  வாதத்தில் ஈடுபட்டனர்.  கட்சி அளித்த பணத்தை பதுக்கிவிட்டதாக அவர் மீது குற்றம்சாட்டினர். மேலும் முத்து மாணிக்கத்திற்குக் கொலை மிரட்டல் விடுத்துள்ளனர். பின்னர் இது குறித்து முத்து மாணிக்கம் காவல் நிலையத்தில் புகார் அளித்தார். இந்த புகாரின் பேரில் கொலை மிரட்டல் விடுத்த பா.ஜ.கவை சேர்ந்த 8 பேர் மீது காவல்துறையினர் வழக்குப் பதிவு செய்துள்ளனர்.

வாகனம்  மோதி  மான் பலி

கிருஷ்ணகிரி, ஏப்.26 - கோடை வெயிலால் நீர்நிலைகள் வற்றிப் போயுள்ளதால் வனப்பகுதி யில் இருந்து உணவு மற்றும் தண்ணீர் தேடி விலங்குகள் கிராமங்களுக்குள் வருவது அதிகரித்துள்ளது. கடந்த 2 நாட்களுக்கு முன்பு போச்சம்பள்ளி அடுத்த தொகரப்பள்ளி காப்புக்காடு பகுதியில் மான் ஒன்று தண்ணீர் தேடி சாலையை கடந்த போது சாலையில் வேகமாக வந்த வாகனம் மோதியதில் மான் அடிபட்டு உயிரிழந்தது. இரவில் அடுத்தடுத்து வந்த வாகனங்கள் மோதிய தில் மானின் உடல் உருக்குலைந்து போனது. இதுகுறித்து தகவல் அறிந்த வனத்துறையினர் மானின் உடலை மீட்டு புதைத்தது டன் விசாரணை நடத்தி வருவதாக தொகரப்பள்ளி வனச்சகர் கூறினார்.