நடந்து முடிந்த மக்களவைத் தேர்தலில், தமிழகம், புதுச்சேரி உள்பட 40 தொகுதிகளிலும் திமுக தலைமையிலான ‘இந்தியா’ கூட்டணி வரலாற்று சாதனையுடன் வெற்றி பெற்றது. இந்த வெற்றியை கொண்டாடும் வகையில், திமுக சார்பில் கலைஞர் கருணாநிதி நூற்றாண்டு நிறைவு விழா, 40 தொகுதிகளிலும் திமுக கூட்டணிக்கு வெற்றி அளித்த மக்களுக்கு நன்றி தெரிவிக்கும் விழா, சிறப்பான வெற்றிக்கு திமுகவை வழி நடத்திச் சென்ற முதல்வர் மு.க.ஸ்டாலினுக்கு பாராட்டு விழா ஆகியவை கோவை கொடிசியா மைதானத்தில் சனிக்கிழமையன்று நடைபெற்றது. லட்சக்கணக்கானோர் திரண்ட இந்த மாபெரும் விழாவில் திமுக தலைவர் மு.க.ஸ்டாலின் பங்கேற்று சிறப்புரையாற்றினார். கி.வீரமணி (திக), கு.செல்வபெருந்தகை எம்எல்ஏ (காங்கிரஸ்), துரை வைகோ எம்.பி. (மதிமுக), கே.பாலகிருஷ்ணன் (சிபிஎம்), இரா.முத்தரசன் (சிபிஐ), தொல்.திருமாவளவன் எம்.பி. (விசிக),  கே.எம். காதர் மொகிதீன் (ஐஎம்எல்யு), ஈ.ஆர்.ஈஸ்வரன் (கொமதேக), தி.வேல்முருகன் (தவாக), எம்.எச்.ஜவாஹிருல்லா (மமக), இரா.அதியமான் (ஆதித்தமிழர் பேரவை), தமிமுன் அன்சாரி (மஜக) உள்ளிட்ட கூட்டணிக் கட்சிகளின் தலைவர்கள் கலந்து கொண்டு உரையாற்றினர். அமைச்சர் க.துரைமுருகன், திமுக பொருளாளர் டி.ஆர்.பாலு எம்.பி., அமைச்சர்கள் உதயநிதி ஸ்டாலின், முத்துச்சாமி, எ.வ.வேலு, கே.என்.நேரு, ஐ.பெரியசாமி, டி.ஆர்.பி.ராஜா, ஆ.ராசா எம்.பி., உள்ளிட்ட தலைவர்கள் கலந்து கொண்டனர்.