ஆஸ்கர் விழாக்களில் கலந்துகொள்ள வில் ஸ்மித்துக்கு 10 ஆண்டுகள் தடை விதிக்கப்பட்டுள்ளது.
அமெரிக்காவின் லாஸ் ஏஞ்சல்ஸ் நகரில் ஆஸ்கர் விருது வழங்கும் விழா சமீபத்தில் நடைபெற்றது. இதில், கிங் ரிச்சர்ட் படத்தில் நடித்ததற்காக சிறந்த நடிகருக்கான ஆஸ்கர் விருதை வில் ஸ்மித் வென்றர். இந்த விழாவில் வில் ஸ்மித்தின் மனைவி ஜாடா பிங்கெட் ஸ்மித்தின் தலை முடியை கிண்டலடித்த நகைச்சுவை நடிகர் கிறிஸ் ராக்கை மேடையில் ஏறி வில் ஸ்மித் அறைந்தார்.
இதனால் ஆஸ்கர் விருது விழாவில் பரபரப்பு ஏற்பட்டது. பிறகு தனது செயலுக்கு வில் ஸ்மித் மன்னிப்பு கோரினார். இந்நிலையில் அகாடமி ஆஃப் மோஷன் பிக்சர்ஸ் ஆர்ட்ஸ் & சயின்சஸ் அமைப்பின் நிர்வாகக் குழு, ஆஸ்கர் விருது விழா உள்ளிட்ட அகாதெமி அமைப்பின் விழாக்களில் கலந்துகொள்ள வில் ஸ்மித்துக்கு 10 ஆண்டுகள் தடை விதித்துள்ளது. அகாதெமியின் குழுவிலிருந்து சமீபத்தில் வில் ஸ்மித் ராஜிநாமா செய்த நிலையில் இந்த முடிவு எடுக்கப்பட்டுள்ளது.
ஆஸ்கர் விருது விழாவில் பங்கேற்க வில் ஸ்மித்துக்குத் தடை விதிக்கப்பட்டாலும் அவருடைய படங்கள் ஆஸ்கருக்குப் பரிந்துரைக்கப்படுவதிலோ அவர் ஆஸ்கர் விருதுகளை வெல்வதிலோ எவ்விதத் தடையும் இல்லை என்றும் கூறப்பட்டுள்ளது.