மோடி அரசின் வர்க்க யுத்தம் தொழிலாளர்களை அடிமைப்படுத்துவதற்கான ஒரு வரைபடம்

மோடி அரசின் வர்க்க யுத்தம் தொழிலாளர்களை அடிமைப்படுத்துவதற்கான ஒரு வரைபடம்

பாஜக தலைமையிலான தேசிய ஜனநாயகக் கூட்டணி பீகார் சட்டமன்றத் தேர்தலில் மிகப்பெரிய அளவில் வெற்றிபெற்றதன் உற்சாகத்திலும், ஆணவத்திலும், தொழிலாளர்களை அடிமைப்படுத்தும் நான்கு தொழிலாளர் தொகுப்பு சட்டங்களுக்கான அறிவிக்கையை வெளியிட்டிருக்கிறது. ஊதியங்கள், தொழில்துறை உறவுகள், தொழில் பாதுகாப்பு மற்றும் சமூகப் பாதுகாப்பு குறித்த இந்தச் சட்டங்கள், நாட்டில் நடைமுறையில் இருந்த 29 தொழிலாளர் சட்டங்களை ‘எளிமைப்படுத்துதல்’ என்ற பெயரில் அவற்றின் பாதுகாப்பு அம்சங்களை முழுவதுமாக மீறிச் செல்கின்றன.  வேலைப் பாதுகாப்பு குறித்த கேள்விக்கு, தொழிலாளர் துறையின் அனைத்து சாத்தியமான பங்களிப்புகளும் கைவிடப்படுகின்றன. அமைப்புசாரா துறையில் ஈடுபட்டுள்ள 90 சதவீத தொழிலாளர்களுக்கு அவர்களை நியமனம் செய்வதற்கென்று எந்த முதலாளிகளும் இல்லாததால், இவர்களுக்கு இப்போது வரை இருந்து வந்த சமூகப் பாதுகாப்புகள் அனைத்தும் மறுக்கப்படும். முறைசாரா துறையில் முறையான நியமனக் கடிதங்கள் இல்லாததால், இந்த நீர்த்துப்போன சட்ட அம்சங்கள் அவர்களை மேலும் சுரண்டலுக்கு உள்ளாக்கி, சட்டப் பாதுகாப்பற்றவர்களாக ஆக்குகிறது. இதுவே ‘எளிமைப்படுத்துதல்’ என்பதன் உண்மையான தொழிலாளர் விரோதத் தன்மை ஆகும்.  ஊதிய மறுப்பும், ‘நிரந்தரமான’ தற்காலிகமும்  அறிமுகப்படுத்தப்பட்டுள்ள தொழிலாளர் தொகுப்புச் சட்டங்கள் அனைவருக்கும் குறைந்தபட்ச ஊதியத்தை உறுதி செய்யும் என்று ஒன்றிய அரசு கூறுகிறது. ஆனால் உண்மை நிலை என்னவெனில், பல மாநில அரசுகள் தற்போதுள்ள குறைந்தபட்ச ஊதியத்தையே மேலும் குறைத்திட கட்டாயப்படுத்திக்கொண்டிருக்கின்றன. திட்ட ஊழியர்கள் உட்பட பல லட்சக்கணக்கான ஊழியர்கள் குறைந்தபட்ச ஊதியத்திலிருந்து விலக்கப்பட்டிருக்கிறார்கள். குறைந்தபட்ச ஊதியத்திற்கே இந்தக் கதி ஏற்பட்டிருக்கிறபோது, நியாயமான அல்லது வாழ்க்கை ஊதியம் குறித்து சொல்லவே வேண்டாம்.  தொழிலாளர் தொகுப்பு சட்டங்கள் ‘கிக்’ (Gig) மற்றும் செயலி வழித் தொழிலாளர்களுக்கு சமூகப் பாதுகாப்பை ஏற்படுத்தும் என்றும் கூறுகிறது. ஆனால் இதற்கு நிதி ஒதுக்கீடு எதுவும் செய்யப்படவில்லை; எந்த காலக்கெடுவும் இல்லை. முதலாளி-தொழிலாளி உறவைப் பற்றி எதுவும் குறிப்பிடாத நிலையில், தொழிலாளர்களின் நிலைமையை மேம்படுத்த ஆதார் என்ன செய்யும்?  தொழிலாளர் தொகுப்புச் சட்டங்களின்படி குறிப்பிட்ட கால வேலைவாய்ப்பு (Fixed Term Employment) சமமான சலுகைகளை உறுதி செய்யும் என்பது மற்றொரு கூற்றாகும். ஆனால் உண்மை என்னவெனில், இது நிரந்தரமான மற்றும் முக்கியத்துவம் வாய்ந்த வேலைகளில் தற்காலிகம் என்பதையே நிரந்தரமாக அறிமுகப்படுத்துவதுடன், அனைத்து நிரந்தர வேலைகளையும் குறுகிய கால ஒப்பந்தங்களாக மாற்றியமைக்கும். நிரந்தர வேலைகளுக்குப் பதிலாகக் குறுகிய கால ஒப்பந்தங்களைப் பயன்படுத்துவது, நிறுவனங்களுக்குள் ஊழியர்களுக்கான ஒரு தொழில் வளர்ச்சிக் கருத்தையே (Career Path) இல்லாமலாக்கி, அவர்களின் மன மற்றும் நிதி ஸ்திரத்தன்மையை கடுமையாக பாதிக்கிறது. இது சேவைத் தொடர்ச்சி, மூப்பு மற்றும் உண்மையான சலுகைகளை இழக்கச் செய்து, தொழிற்சங்கங்களைக் கட்டப்படுவதைப் பலவீனமாக்கும்.  கைவிடப்படும் ஒழுங்குமுறையும் முதலாளிகளுக்குச் சலுகையும்  தொழிலாளர் தொகுப்புச் சட்டங்கள் இப்போது தொழிற்சாலை ஆய்வாளர்கள் தொழிற்சாலைகளுக்குச் சென்று ஆய்வு செய்து அறிக்கை அனுப்பும் நடைமுறையை எல்லாம் ஒழித்துக்கட்டிவிட்டது. அதற்குப் பதிலாக முதலாளிகள் தாங்களே ஒரு சுய சான்றிதழை அரசாங்கத்திற்கு அனுப்பிவிட்டால் போதும் என்று சொல்கிறது. புகார்கள் அடிப்படையிலான ஆய்வைச் சுய சான்றிதழால் மாற்றுவதன் மூலம், ஒரு ஒழுங்குமுறை ஆணையத்தின் பொறுப்பிலிருந்து அரசாங்கம் விலகுகிறது. இது முதலாளிகள், ஊழியர்களின் பாதுகாப்பிற்காக நிறுவப்பட்ட அனைத்து விதிகளையும் மீறிச் செயல்பட முழுச் சுதந்திரம் அளிக்கிறது.  இந்தத் தொழிலாளர் தொகுப்புச் சட்டங்களின் வரையறைக்குள் குறு, சிறு, நடுத்தரத் தொழில்களில் வேலை செய்யும் தொழிலாளர்கள் கொண்டுவரப்படவில்லை. செஸ் (வரி) வசூலில் வெளிப்படைத்தன்மைக்கான எந்த ஒரு வழிமுறையும் இல்லை. சுரங்கம் மற்றும் தோட்டம் போன்ற ஆபத்தான இடங்களில் ஆய்வுகள் நீர்த்துப்போகச் செய்யப்பட்டிருப்பதால், விபத்துகள் அதிகரிக்கும். மேலும், முதலாளிகள் கிரிமினல் பொறுப்பிலிருந்து விலக்கு அளிக்கப்படுவார்கள்.  ஒன்றிய அரசாங்கம், இந்தச் சட்டங்களை மாற்றியமைப்பதற்காக தொழிலாளர்களுடன் பல்வேறு ஆலோசனைகளை நடத்தியதாகக் கூறிக்கொண்டிருக்கிறது. ஆனால், அரசாங்கத்திற்கும், முதலாளிகளுக்கும், தொழிலாளர்களுக்கும் இடையே முத்தரப்பு ஆலோசனைகளை மேற்கொள்ளும் இந்தியத் தொழிலாளர் மாநாட்டின் (ILC) எந்தக் கூட்டமும் கடந்த பத்தாண்டுகளில் நடத்தப்படவில்லை. எனவே, இந்தச் சட்டங்கள் நாடாளுமன்றத்தில் எந்தவொரு விவாதமும் இன்றி நிறைவேற்றப்பட்டன. இது முதலாளிகளின் குற்றங்களைக் குற்றமற்றதாக்குகிறது. ஆனால், கூட்டுபேர உரிமைகளை நிலைநாட்ட முயற்சிக்கும் தொழிலாளர்களைக் கிரிமினல்களாக ஆக்குகிறது, வெளிப்படையாகவே போராட்ட உரிமையையும் மறுக்கிறது. பொருளாதார விளைவுகள்:  ஊதியப் பங்கு வீழ்ச்சி  ​‘தொழில் செய்வதை எளிதாக்குதல்’ (‘Ease of Doing Business’) என்பதற்காகவே தொழிலாளர் தொகுப்பு சட்டங்கள் நிறைவேற்றப்பட்டிருக்கின்றன என்று மீண்டும் மீண்டும் விளம்பரப்படுத்திக்கொண்டிருக்கின்றனர். இது அதிக முதலீடுகளை உருவாக்கும் என்றும், அதன் காரணமாக வேலைவாய்ப்புகளும் அதிகரிக்கும் என்றும் கதை அளக்கின்றனர். ஆனால் எதார்த்த உண்மைகளுக்கும் இவற்றுக்கும் கிஞ்சிற்றும் சம்பந்தம் இல்லை என்பதை தொழிற்சாலைகளின் வருடாந்திர ஆய்வு அறிக்கைகள் வெளிச்சம்போட்டுக் காட்டுகின்றன.  இந்த அறிக்கைகள் தொழிலாளர்களின் ஊதியப் பங்கில் தொடர்ச்சியான வீழ்ச்சியைக் காட்டுகின்றன: 1981-82இல் 30.27 சதவீதத்திலிருந்து 2023-24இல் வெறும் 15.97 சதவீதமாகச் சரிந்துள்ளது. அதே காலகட்டத்தில், முதலாளிகளின் இலாபம் 23.39 சதவீதத்திலிருந்து 51.01 சதவீதமாக அதிகரித்துள்ளது. உற்பத்தித் துறையில் பத்தாண்டு வளர்ச்சி விகிதமும் 2013-14இல் 6.7 சதவீதமாக இருந்தது, 2023-24இல் 4.8 சதவீதமாகக் குறைந்துள்ளது.  உள்நாட்டு கிராக்கி (demand) கடுமையாக குறைந்து வருவதை புள்ளிவிவரங்கள் தெளிவாகக் காட்டுகின்றன. பெருநிறுவனங்கள் மற்றும் முதலாளிகள் உழைப்பைச் சுரண்டுவதற்கான அனைத்து கட்டுப்பாடுகளையும் நீக்குவது அதிக சமத்துவமின்மைக்கும் வேலையின்மைக்கும் வழிவகுக்கும். இத்தகைய நிலையற்ற நிலைமை எவ்வாறு முதலீட்டைத் தூண்டும்?  முன்னோக்கிச் செல்லும் பாதை: வர்க்கப் போராட்டம்  தொழிலாளர் சட்டத்தொகுப்புகள் உண்மையில் தொழிலாளர்களை மேலும் அடிமைப்படுத்துவதற்கான ஒரு சதியேயாகும். பொருளாதார உற்பத்திக்கு அடிப்படைக் காரணிகளான உழைப்புக்கும் மூலதனத்திற்கும் இடையிலான சமநிலையை அரசாங்கம் நீக்கிவிட்டு, முதலாளிகளின் மீதான அனைத்து விதிமுறைகளையும் நீக்க நடவடிக்கை எடுத்தால், பொருளாதார உற்பத்தி முறையே ஸ்தம்பித்துவிடும்.  பொருளாதார உற்பத்திச் செயல்பாட்டில் தொழில்நுட்பத்தை ஒரு முக்கிய அங்கமாகக் கருதினால், இன்றையதினம் அது மூலதனத்துடன் ஒருதலைப்பட்சமாக இணைக்கப்பட்டிருக்கிறது. இது உற்பத்தித்திறனை அதிகரிக்கும் என்றபோதிலும், தொழிலாளிக்கு எந்தப்பாதுகாப்பும் இல்லை. இது தொழிலாளியை மேலும் சுரண்டுவதற்கே இட்டுச்செல்லும். தொழிலாளர் தொகுப்புச்சட்டங்களில் உள்ள ஒவ்வொரு சட்டப்பிரிவும் அந்தத் திசைவழியிலேயே அமைக்கப்பட்டிருக்கிறது. எனவே, இவை தொழிலாளர் வர்க்கத்திற்கு எதிரான ஒரு “வர்க்க ஜிஹாத்” - அதாவது - முதலாளி வர்க்கத்தின் ஒரு யுத்தமே ஆகும்.  எனவே, முன்னோக்கிச் செல்லும் ஒரே வழி, இந்த அருவருப்பான சீர்திருத்தத்தை எதிர்த்து, தொழிலாளர்கள் ஒன்றுபட்டு கூட்டுப் போராட்டம் நடத்துவதும், வலுவாகப் போராடுவதும்தான். அந்த வகையில் தொழிலாளர்களும் விவசாயிகளின் பரந்துபட்ட பிரிவினரும் நிலைமையைச் சமாளிப்பதற்காக ஒன்றுபட்டுப் போராட முன்வந்துள்ளனர். நவம்பர் 30, 2025 தமிழில் : ச.வீரமணி