வன்முறை என்பது ‘கவிதை’ போல உணர்வுகளின் வெளிப்பாடு தான். ஆனால் கவிதையைப் போல் அல்லாமல், இது எப்போதும் மோசமானது; பெரும்பாலும் சுய அழிவை ஏற்படுத்துவது. மருத்துவத்துறையினர் மீதான வன்முறை புதிதல்ல என்றாலும், சமீபகாலமாக இது அதிகரித்து வருகிறது. சென்னையில் சில நாட்களுக்கு முன்பு நடந்த சம்பவத்தில், ஒரு நோயாளியின் உறவினரால் மருத்துவர் குத்தப்பட்டது மிகவும் கொடூரமானது. கலைஞர் நூற்றாண்டு மருத்துவமனையில் பணிபுரியும் புற்றுநோய் நிபுணர் டாக்டர் பாலாஜி ஜெகநாதன், விக்னேஷ் என்ற இளைஞரால் குத்தப்பட்டார். விக்னேஷின் தாயார் மிக முக்கிய சிகிச்சை பெற்று வந்தார். ஆரம்ப செய்திகள் கூறியது போல, கோபத்தில் நடந்த தாக்குதல் அல்ல இது. மருத்துவமனைக்கு கத்தியுடன் வந்தது இது திட்டமிட்ட தாக்குதல் என்பதை உணர்த்துகிறது. குறிப்பிடத்தக்க விஷயம் என்னவென்றால், நோயாளிக்கும் அவரது குடும்பத்தினருக்கும் கீமோதெரபியின் பக்க விளைவுகள் குறித்து முன்பே விளக்கப்பட்டிருந்தது. அவர் இரண்டு தனியார் மருத்துவமனைகளில் சிகிச்சை பெற்றிருந்தார். ஆனால் விக்னேஷ், மருத்துவ ஆலோசனைக்கு எதிராக தன் தாயை வெளியே கொண்டு சென்று, மீண்டும் கலைஞர் மருத்துவமனைக்கு கொண்டு வந்தார். கீமோதெரபியால் தாயாரின் நுரையீரல் பாதிக்கப்பட்டதற்கு மருத்துவரை பொறுப்பாக்கி ஆத்திரத்தில் தாக்கினார். இதற்கு முன்பு இதய நோய்க்கு இரத்தம் மெலிதாக்கும் மருந்து எடுத்து வந்த டாக்டர் பாலாஜி, உயர்தர சிகிச்சை வசதிகள் கொண்ட சிறப்பு மருத்துவமனையில் இருந்ததால் மட்டுமே காப்பாற்றப்பட்டார். சுகாதாரத் துறையினர் மீதான வன்முறை, அவர்களின் கவனக்குறைவைப் போலவே வெறுக்கத்தக்கது. உயிர்-மரண விஷயங்களில் உணர்ச்சிவசப்படுவது இயல்பானது. ஆனால் உடல்நிலை சீரழிவு அல்லது மரண பயத்தால், சிகிச்சை அளிப்பவர்கள் மீது வன்முறையில் ஈடுபடுவதை ஏற்க முடியாது. மருத்துவர்கள் நல்ல முறையில் நோயாளிகளிடமும் அவர்தம் குடும்பத்தினரிடமும் நடந்து கொண்டு, நோய் சிகிச்சையின் சாத்தியமான விளைவுகளை விளக்குவது முக்கியம். இந்த வழக்கில், நோயாளி சென்ற அனைத்து மருத்துவமனைகளிலும் இது தெரிவிக்கப்பட்டிருந்தது குறிப்பிடத்தக்கது. மாநிலத்தில் மருத்துவர்கள் ஒரு நாள் போராட்டத்தில் ஈடுபட்டனர். அண்மையில் கொல்கத்தாவில் நடந்த ஆர்.ஜி.கர் என்ற மருத்துவமனையில் இளம் மருத்துவரின் பாலியல் வன்கொடுமை மற்றும் கொலை சம்பவம் அவர்களிடையே அதிக பதற்றத்தை ஏற்படுத்தியுள்ளது. மன அழுத்தத்தில் மனித உணர்வுகள் கணிக்க முடியாதவை என்றாலும், மருத்துவமனைகளில் பொருள் ஸ்கேனர்கள், கண்காணிப்பு கேமராக்கள், பாதுகாப்பு சோதனைகள், பாதுகாப்பு பணியாளர்கள் போன்ற தடுப்பு நடவடிக்கைகளே மருத்துவர்களின் பாதுகாப்பை உறுதி செய்யும் ஒரே வழி ஆகும்.
